بابكر سلك : نقلة ونقلتين

> موضوع شيبوب ده مضحك شديد
> وانا شخصياً بضحكني اكتر من باقي الناس
> الاهله اشتغلوا شغل كبير في تحويل مسار الولد
> لكن خشمهم خفيف
> قبل ما تتم عملية شيبوب
> ملوا ليك الواتس صور شيبون والكسكته
> وشيبوب والعمه
> وشيبوب واقف
> وشيبوب قاعد
> وشيبوب في سلم الطياره
> وشيبوب جوه الطياره
> وشيبوب في جوبا
> يعني ورونا دايرين يعملوا شنو
> ومودنو وين
> وحايجيبوهوا كيف
> مفروض يتموا الشغل اول
> وبعدين يصرحوا ويفرحوا
> لكن سنه اولي جوهره بوظت الشغل
> ذكروني نقله ونقلتين
> نقله راجل
> معرس نقلتين
> العوارة كاتلاهم
> والبخل اسكت بس
> اها
> قال ليك يوم نقله ونقلتين ضبحوا
> ودخلوا اللحمه جوه وقطعوها
> زول سمع بالضبيحه مافي
> الجيران ما ادوهم كوم
> اها
> جاهم خبر موت في القريه الجمبهم
> ما عرفوا يعملوا شنو في اللحمه
> اخيرا وصلوا لوضع اللحم في برمه
> ودفنها في الراكوبه
> وقفلوا باب الشارع
> وحفروا حفرة ختوا فيها المفتاح ودفنوها
> ومشوا
> اي زول يقول ليهم ماشين وين يا نقله ونقلتين
> يقولوا ليهو بصوت واحد
> لا عندنا بكا ولا مسافرين
> ولا ضبحنا ولاختينا اللحم في البرمه ودفناهو في الراكوبه
> ولا قفلنا باب الشارع بالمفتاح ولاختينا المتاح في حفرة في خشم الباب
> تاني يقابلهم زول
> علي وين يا نقله ونقلتين
> وبي صوت واحد
> لاعندنا بكا ولا مسافرين
> ولا ضبحنا ولا ختينا اللحم في البرمه ودفناهو في الراكوبه
> ولا قفلنا باب الشارع بالمفتاح ولا ختينا المفتاح في حفره في خشم الباب
> وهكذا البلد كلها عرفت بالضبيحه والبرمه ومكان المفتاح والسفر
> ناس الحله دخلوا البيت واكلوا الشيات والنيات ودفنوا ليهم البرمه محل المفتاح والمفتاح محل البرمه
> ديل نقله ونقلتين
> اها
> قابلنا نقله ونقلتين بتاعين العصر ده
> علي وين يا نقله ونقلتين
> قالوا لا سايقين شيبوب ولا مودنو الملكيه كمحترف ولا جايبنو اعاره ولا مسافرين الليله
> البلد كلها شافت شيبوب في الطياره وفي نادي الملكيه وفي الفندق وفي بيت كردنه
> ودخلنا شلنا شيبوب وخلينا البرمه مع المفتاح جمب باب الملكيه
> وناس نقله في البكا
> هو جنس بكا
> سنه اولى نقله يا نقلتين
> نقله عرفناهو لكن نقلتين منو يا اختي؟
> ايها الناس
> يوم 21/12/2015م يوم المهرجان
> ونكررها
> دايرين من دخل المهرجان نسدد تكلفة المعسكر الاعدادي
> ودايرين في ساعة الصفر نحول رصيد يتحول دولار نحاسب بيهو الاجانب
> نحنا كتار ما شاء الله
> اي زول فينا يساهم
> نتملي قروش لمن نقول بس
> المهرجان فرض عين على الموجودين داخل الخرطوم والمدن المجاوره
> وتحويل الرصيد فرض عين على اي مريخابي داخل السودان
> همتكم يا شفوت
> المهم
> نقله في محاولة لاحداث نقله ولكن!!
> ايها الناس
> العضويه ماشه تمام
> لكن بنحلم بي عدد اكبر
> عضويه ام رأس ما تنسوا
> العضويه بالرأس كتر خيركم ما دايرنكم
> ايها الناس
> ان تنصروا الله ينصركم
> اها
> نجي لي شمارات والي الخرتوم
> والينا
> المولد دخل علينا
> يا ناس المولد يقسطوا لينا
> يا تمويل اصغر للحلاوه تدينا
> يا نضطر نقول المولد بدعه ما بتعنينا
> عشان نزوغ من الشفع يا والينا
سلك كهربا
ننساك كيف والكلب دق يدا بيد وامطر لؤلؤا من نرجس وسقي انيابا ما لاكت ليها سنين
والى لقاء.
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *