بابكر سلك : رفع المعاناة عن كاهل جماهير المريخ

* الصدفة وحدها هى التى قادت شخصيات قوية للجنة التسيير المريخية
* وبدل الحرب غير المعلنه على الناس ديل
* حقوا إذا ما دعمناهم بالمساندة
* نخليهم يشتغلوا
* وما نعرقل عليهم العمل
* فرجال بهذا الفهم وبتلك القامات السامقة
* يجب ان لايخسرهم المريخ بسبب المشاحنات (الكيمانيه)
* ولذا
* أدعوكم إخوتى للمساندة
* ولا أعنى بها السكوت عن الإخفاقات
* بل أعنى بها المشاركة بالرأى وبالدعم
* فإن فعلوا خيراً نشكرهم عليه من بعد الله
* وإن كان الخطأ مصاحباً لعمل قاموا به
* فمن الشيطان قبل ان يكون منهم
* ننتقدهم بكل أدب ونوضح وجهة نظرنا
* لكن ان نعيرهم ونرميهم بالإساءة
* فهذا هو عين العيب والله
* إخوتى فى مجلس التسيير
* سير سير يا مجلس التسيير
* المهم
* البعض بدأ يتحدث عن تراورى
* والحديث عن ومع تراورى إعتدنا أن يكون فى بداية الموسم
* هذا المتلاعب غير المنضبط
* إذا تواجد فى التشكيل يؤدى بأنانيه وشوفونيه
* لايقدر المجهود الذى يبذله زملائه فى الحصول على الكرة
* فيفقدها بكل بساطه دون قتال
* ويعمل حركة ملكه جانسى
* أنحنا ما هنود يا تراورى
* ما هنود عشان تجى فى بداية الموسم تشيل مقدم العقد وتطفش
* وإنضباط تراورى يشبه رفع لمعاناة عن كاهل الجماهير
* فلو رفعت الحكومة المعاناة عن كاهل الجماهير
* بنضبط تراورى
* فحكومه ترفع شعاراً لرفع المعاناة عن كاهل الجماهير
* ويصفق نوابها بالبرلمان للزيادات ورفع الدعم
* تشبه تراورى الذى يقبض مقدم العقد ويزوغ
* إن كنا قد قنعنا من رفع المعاناة عن كاهل جماهير الشعب
* أرفعو االمعاناة عن كاهل جماهير المريخ بنسيان ذلك التراورى
* وخلوهوا فى بطننا
* ما تخلونا فى بطنو
* عقدو ينتهى يمشى يشتكى
* ووقتها البينة حاضرة
* أيها الناس
* حرام والله ان تكون لنا كفاءة كمثل دكتور مدثر خيرى
* ولا يدير المكتب التنفيذى
* متين حا نستفيد من كوادرنا يا ناس؟؟!
* أيها الناس
* ضفر عريس
* الله تم ليه
* بيت مال وعيال يا كابتن
* تيمان سريعين كده
* عندنا مشكلة أطراف
* المهم
* سيدا تسيد الموقف بشهادات سمعنا إنها مضروبة
* ما مضروبه ضربه شديده
* لكن فيها محاباه
* والبطل أصلو بظهر آخر الفيلم ليكمل إنتقامه من الخيانة
* يصفى حساباتو كلها فى المشهد الأخير
* وبعدها بتلقى فى الشاشه كسكته طايحه على الأرض
* وكوم ناس ميتين
* وغبار
* وبرنسيسه متلبده خلف الحانه
* وبتاع الحانه تحت البنك
* وتلاتة أنفار بيسترقوا النظر
* ثم يفروا هاربين
* والبطل ينفخ المسدس ويعيده لبيته
* ثم
* The End
* أيها الناس
* إن تنصروا الله ينصركم
* أها
* نجى لى شمارات والى الخرتوم
* أكان شفت يا والينا
* الحوار الوطنى هامينا
* بس قول للناس البتحاوروا يا والينا
* يتحاوروا لينا
* ما يحاورونا ويبيضوها لينا
* لأننا كيشه يا والينا
* ياما بيضوها لينا
* وقول ليهم يا والينا
* نحن نؤمن بإنشوده الرائع الفنان المبدع بوشناق التى تقول:
* أنا حلمى بس كلمه واحده..أن يظل عندى وطن
* لا حروب ولا خراب .. ولا مصائب ولا محن
* خذوا المناصب والمكاسب..لكن خلو لى الوطن
* يا وطن وانت حبيبى .. زنت عزى وتاج راسى
* أنت يا فخر المواطن .. والمناضل والسياسى
* أنت أجمل وأنت أغلى .. وأنت أعظم من الكراسى
* قول ليهم الكلام ده يا والينا
سلك كهربا
**ننساك كيف والكلب لما يسمع وطن ووطنيه ومواطن بقول الأسماء دى سامعها
وين؟..سامعها وين؟..سامعها وين يا ربى؟!!
واللى لقاء
سلللللللللك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *