محمد عبد الماجد : مليار ونص عشان تقعد في (الكنبة)

محمد عبد الماجد : مليار ونص عشان تقعد في (الكنبة)

تعريف الزول (الاشتر) والذي يمكن ان يخدم الطرف الاخر من غير ان يقصد يمثله لنا الآن عبدالحي عبدالتام عضو لجنة تسيير المريخ.
والقصة نفسها يمكن اخراج خلاصتها من ناحية تانية.
احيانا بيكون في (شافع) يكشف ليك اي حاجة.
بدون ما تسألو.
زول (بتبرع) ليك بالمعلومة.
ابوي قال لي امي انا ما عندي قروش – انا اجيب ليكم من وين؟.
بعنا (التلاجة)!!.
فكينا (المروحة).
في (شُفع) كدا…الشافع من تلقاه يقول ليك : ابوي قاعد في البيت.
او ابوي الليلة ما مشى الشغل.
او اتغدينا بي بامية مفروكة ..نأكل فيها لينا اسبوع.
او سيد البيت جاء وعمل ليه شكلة مع ابوي.
شفع كشافين حال بس.
كهربتنا قطعت.
وناس عيسي شالوا مننا (خلاطتنا) لغاية الآن ما رجعوها لينا.
او شالوا (المكوة) رجعوها لينا (بايظة).
اما الزول الاشتر – فهو الشخص بدخل ليك غلط في الموضوع.
يدخل ليك في الموضوع بدون مناسبة.
زول محرج.
بيلافح الكلام.
الزول الاشتر كدا.
في العرس ..يقوم يمشي يقاصد ليه زول في الحفلة – وبدون مناسبة يقول ليه : (انت موش العروسة دي اتقدمت ليها واهلها ما ادوك ليها).
صلعتك بقت زي ميدان المولد الكبير.
ونخرتك زي رمز الجندي المجهول.
الزول الاشتر ممكن في موقف حساس ..يمسك ليه زول بدون مناسبة برضو ويقول ليه انت القروش العاوز منك ود عمك رجعتها ليه؟.
انت مالك ومال ود عمو ..(ديل اهل في بعضهم).
او عملت شنو في (النفقة)؟.
نائب الامين العام لمجلس المريخ – الآن بقوم بنفس الدور.
زول (محرج).
وبيكشف (الامتحان) من غير ما يسألوه.
بيتبرع ليك بالمعلومات براهو.
زي الزول البقول ليك قطعة الارض دي عاوزين فيها (600) الف جنيه.
او بنت عمك عثمان جاها عريس (مغترب).
او شيخ الطيب طلع ولدو من المدرسة – قال ليه انت ما فيك فايدة ..احسن تدخل السوق…وتساعدني في البيت.
في ناس بتبرعوا ليك بـ (المعلومات).
والله الخروف دا يكون فيه (لحمة).
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
عبدالتام هذا كأن الذي عيّنه في مجلس المريخ رئيس نادي الهلال اشرف الكاردينال – فقد ظل الرجل يكشف المريخ في كل تصريحاته التى يعلن عنها في صحف المريخ.
صحف المريخ نفسها هذه الايام شغالة (خبط) في المريخ ، ما خلت ليه حاجة.
ربما لهذا اعلن مجلس ادارة نادي المريخ اعادة اصدار صحيفة المريخ.
معارضة مجلس المريخ الحالي تتمثل الآن في الصحف.
ان عادت صحيفة المريخ اتوقع ان يقوم المجلس بمقاطعة صحف المريخ بسبب الاخبار السالبة التى تنشر عن المريخ هذه الايام.
لكن مع هذا لا نستطيع ان نلوم صحف المريخ في ظل تواجد عبدالحي عبدالتام الشخص الذي سبق له ان وصف (بيان) المريخ الذي اصدره بعد عودة (شيبوب) للهلال بالضعف.
وكأن عبدالحي عبدالتام هذا – رئيس لجنة المظاليم في ديوان الحكم المحلي – كأنو ما عندو قضية بالمجلس.
وهو نائب الامين العام لمجلس المريخ واكتر زول في الدنيا اتصور مع (شيبوب).
قبل وبعد عودة شيبوب من عاصمة جنوب السودان (جوبا).
احد صحف المريخ امس كانت قد نشرت هذا الخبر على لسان عبدالتام :
(فاجأ مجلس ادارة نادي المريخ السابق بقيادة الرئيس جمال الوالي جماهير ناديه بالتعاقد مع حارس مرمى الهلال السابق المعز محجوب بمبلغ ضخم وصل إلى مليار و نصف برغم أن المعز محجوب لم يجد لنفسه مقعداً في التشكيلة الاساسية للفريق في المرحلة السابقة وفضّل الجلوس احتياطياً لليوغندي جمال سالم الحارس الأول وذكر محي الدين عبد التام نائب الأمين العام لمجلس المريخ الحالي أنهم تفاجأوا بتعاقد المجلس السابق مع المعز محجوب بمبلغ مليار ونصف ولم يتسلم منها غير مائتي مليون مؤكداً أن المجلس ملتزم بتسوية بقية مستحقاته المالية بطرف النادي).
المريخاب ديل عندهم عقدة (نقص).
اللاعب المريخي لو قطع نفسو من اجل المريخ ..المريخ لا يمكن ان يعطيه هذا المبلغ.
إلّا اذا دخل الهلال طرف في التفاوض وطلب اللاعب.
المعز محجوب اللاعب الذي صرف الهلال عنه النظر – ولم يجد نادي ولائي يطلبه منحه المريخ مليار ونصف مليار.
الكلام دا القالو منو؟.
الكلام دا ما قالوا معتصم محمود.
ولا قالوا الرشيد علي عمر.
الكلام دا قالوا نائب الامين العام للمريخ عبدالحي عبدالتام.
مليار ونص مليار على شنو؟.
عشان يقعد ليكم في (الكنبة).
هسع القعّاد في (الكنبة) عاوز ليه قروش قدر دي.
المعز محجوب لو مشى الدهب ولقى ليه (كُتلة) بتاعة (دهب) – ما ممكن يطلع بالمبلغ دا.
لو طلع ليه (عفريت)..وقال ليه يا المعز محجوب بعد هذه السن …عاوز كم؟.
المعز محجوب ما بقول عاوز لي مليار ونصف المليار.
تجوا انتوا يا جمال الوالي بعد العمر دا – تمنحوا المعز محجوب مليار ونصف المليار.
وقت فالحين كدا.
وبتعرفوا تدفعوا مليار ونصف المليار – (شيبوب) دا خليتوه (هاوي) ليه؟.
ليه ما قيمتوه وسجلتوه محترف.
المعروف ان المريخ عرف قيمة (شيبوب) بعد ان طلبه الهلال ليدفع (23) الف دولار (مطاردة) فيه ..ويحوم بيه على (4) مطارات ، ويمنحه رقم فلكي.
مع ذلك فان شيبوب رفض عرض المريخ هذا – وفضل العودة من جديد للهلال.
مجلس المريخ (ساقط اعدادية)…امس اشتكي (شيبوب).
وقت بتعرفوا تشتكوا – ما تشتكوا المعز محجوب شال منكم مليار ونص مليار وقاعد في بيتهم.
ناس بلة جابر – تعبانين ساكت.
ناس الباشا ..حارقين دمهم ساكت.
يجروا جرى الوحوش ..والقروش يشيلوها ناس بكري المدينة والمعز محجوب وعمر بخيت.
ليهم حق ناس شيبوب وميسي وباسل واباذر ومحمد عبدالوهاب يمشوا يشوفوا مستقبلهم.
يشوفوا مصلحتهم وين؟.
اصلكم انتوا ما بتقدروا اللاعب إلّا اذا لعب ليه (12) سنة في الهلال.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
المعز محجوب ايام مجده – لمن كان موقف البلد دي على فد (حارس) وقبل السماح للحراس الاجانب باللعب في الدوري السوداني لم يصل المعز محجوب لهذه الرقم.
عندما كان هناك صراع على اللاعب بين الهلال والمريخ – سعرو ما وصل الكلام دا.
تجوا يا جمال الوالي بكامل ارادتكم ..ومع تمتعكم بقواكم العقلية …تمنحوا المعز محجوب وهو في اخر ايامه مليار ونص مليار.
شغل جمال الوالي هذا يثبت (المتاريس) التى قصد ان يضعها المجلس السابق للمجلس الذي سوف يخلفه.
خاصة ان المعز محجوب استلم فقط من عقده (200) مليون جنيه.
دا شغل (معارضة) عديل كدا.
المعز محجوب الآن طالب المريخ مليار و300 مليون جنيه.
دي يبجبوها ليه من وين؟.
لكن نحن عافيين عليك يا المعز محجوب.
عرفت تخلص حقنا كلو من الجماعة.
ناس الباشا وبلة جابر قدر ما عملوا وقدموا ما عرفوا يطلعوا بنصف المبلغ الذي طلعت به.
اللاعب البيجي من الهلال بكون (مفتح).
اصلا هو انتقل للمريخ عشان المال.
لا رغبة ..ولا كورة.
لذلك ليس هناك حرج في الامر.
شييلوا حقكم من (النفط).
ولا تخجلوا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
…………..
و
المليار ونص دي كانت عملت ليكم (طابق) في استاد المريخ.
على الاقل كانت جابت ليكم قلاب طوب – لو عملت ليكم طابق.
قالوا ليك المعز محجوب بقى يقعد في كنبة المريخ بي دفتر الشيكات.
عندي ليكم حل.
مسكوا المعزخزينة المريخ.
يعني خلوه يبقى امين الخزينة.
ممكن تستفيدوا منو اكتر.
الزول دا طلع (لورد) عديل كدا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية).
………….
السيدة (ل) – ضلك بسلم ..وانت لا.
وقرّط على.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *