بابكر سلك : يناير جا يا ناير

> أيها الناس
> مجلس جمال كان عندو معارضين كتار
> وتنظيمات اعلنت معارضتها بكل شفافيه وتجرد
> واجتماعات دورت
> وورق تمت طباعته
> وبرنامج طويل عريض
> ومحاولة وجود على المدرجات من خلال الاوراق التي تحمل شعار الكيان
> ولكن لم نسمع بهم انهم كتنظيم او كافراد ينتمون للتنظيم
> لم نسمع بانهم دعموا الكيان
> وقبلناها منهم
> قلنا يمكن معارضتهم لمجلس جمال هي التي قيدتهم ومنعتهم من دعم الكيان
> برغم من انه مبرر غير مقنع
> لأن الدعم يذهب للكيان لا يذهب لجمال
> يا قوم
> جمال مشى
> وجات لجنة التسيير
> ولسه الجماعه ما دعموا
> برغم ان المريخ يحتاج للجنيه عديم القيمه ده
> اها
> الما نعهم من الدعم شنو ؟؟؟
> وهل هم ايضاً معارضه للجنة التسيير؟
> يبقى المعنى هم معارضه لاي مجلس
> وتبقى القصه معارضه من اجل المعارضه لا من اجل صالح الكيان
> ايها الناس
> جمال دعم لجنة التسيير
> وسوداكال دعم لجنة التسيير
> والفادني دعم لجنة التسيير
> والجماهير التي حولت الرصيد دعمت لجنة التسيير
> معارضة لجنة التسيير بتدعم متين؟
> وقد يقول قائل انهم انطلاقاً من ديمقراطية المريخ
> يعارضون صرف الرجل الواحد
> لذا لم يدعموه
> وانطلاقاً من ديمقراطية المريخ
> يعارضون التعيين
> عشان كده تواصل عدم الدعم
> يا اهل الربع
> ايام لجنة التسيير اثبتت من يدعم ومن يعارض
> واثبتت ان بالربع رجالاً لا يشترطون الجلوس على كراسي القبيله ليدعموها
> واثبتت ان هناك اناساً يتمسكون بديمقراطية المريخ والتي تمنعهم من الدعم
> والحل ككيف؟؟
> المهم
> معسكر اديس دور
> وشفوت الدوحه جاهزين للمرحله القادمه والاهم
> والاعداد مراحل
> وبرغم ضيق ذات اليد
> الا ان الامور ماشه
> وونسي وعد بتدفق الاموال في يناير
> وها هو يناير جا يا ناير
> المهم
> فلقة معسكر تونس تشبه الى حد بعيد فلقة معسكر الفجيره
> وفلقة معسكر الفجيره تشبه الي حد بعيد فلقة معسكر ايطاليا الما مشوهو لي اسي
> ايها الناس
> المريخ في اسوأ حالاتو الماديه ما نقصو شيء
> والهلال في جميع الاحوال لازال صفراً يحبو
> ومكنة البطولة المحببه
> ومواعيدها جات
> ما مكنة جديده
> مكنة قدييييييييييييييييمه
> بنسمع فيها لينا سبعة وتمنين سنه
> ولسه يا ما نسمع
> ايها الناس
> المورده نزلت ليه ؟؟؟
> لما نزلت موش كان فيها شيبوب اساسي؟
> طيب الضيع قونين والشبكه فاضيه في المباراه الودت المورده في داهيه منو؟
> وضيعهم ليه؟!!
> كيشه يعني ولا كيشه يعني ولا كان كيشه؟
> الله يعيد المورده لسابق عهدها
> ويا مورداب شدوا حيلكم
> الممتاز براكم خلا
> ومكانكم فاضي
> لو اصريتوا بقليل من الجهد بتجوا
> المهم
> نتمنى موسماً كرويا رائعاً
> فيه احترام للقانون والكيانات والهيئات والدولة
> فيه تنافس شريف
> يخطئ ولا يظلم
> يقلل الأخطاء
> ويوزع لا يظلم على جميع الفرق
> ما يخلي القصه واضحه وصابه في اتجاه واحد
> ايها الناس
> راية التنافس الافريقي السنه دي حايشيلوها اربعه فرق في البدايه
> بعد اول خطوه حايشيلوها فريقين
> واحد في الابطال وواحد في الكونفدراليه
> وفي الخطوه التانيه
> حايشيلها فريق واحد في الابطال
> وحيكون امل البلد كلها
> موش امل عطبره براها
> عشان كده
> على الجماهير ان تبدع اكتر من ابداع السنة الفاتت
> وزي ما قالوا ناس الاولتراس
> 2015 كانت رائعه
> 2016 نتوقعها اروع
> فطومه اختي
> بالمنطق كده
> قروش الجوهره من وين؟
> منطقينا
> منطقينا زي ما منطقتو بكري المدينه
> الخلي ليكم ورقتكم في صالون كردنه حزينه
> منطقينا وقولي لينا وكلمينا
> قروش الجوهره من وين يا حزينه؟؟
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> خبر نجاح المباحث في استرجاع الدهب سارينا
> يا ريت يرجع كل الدهب يا والينا
> ويظهر في مطابخنا وصوانينا
> في هوت دوقنا في بيتزتنا في حلوانينا
> وندخل ساندوتش البيرقر في خشومنا كلو زي السي دي يا والينا
> في مدارسنا وفي علاجات قلوبنا وفي مكنات غسيل كلاوينا
> وفي ايدين نساويننا
> يتعشكبن دهب من حر مالنا ما من حكاوينا
> الواحده لو جات شاقه السوق
> كل اجهزة الدهب تصفر يا والينا
سلك كهربا
ننساك كيف والكلب لما يشوف دبله بصفر.. كلب ولا جهاز دهب يا كافي البلا
والى لقاء.
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *