محمد عبد الماجد : الكازاخستاني دي كورة ولا بتنجان؟

محمد عبد الماجد : الكازاخستاني دي كورة ولا بتنجان؟

هسع رابطة الهلال في الدوحة لو ما اتبرعت ليكم بـ (10) آلاف ريال ناس عطرون ديل إلّا تبيتوهم القوا
يرجعوا (تراوري) بعد العملو داك كلو – نقول قاصدين بس يحرجوا جمال الوالي ويوصلوا ليه رسالة
لجنة التسيير الحاجة الوحيدة العملتها للمريخ – رجعت شيبوب من جوبا ..وسلمتو للكاردينال في قاردن سيتي
انتوا ناس خالد النعسان ديل عاوزين تشاركوا بيهم في معركة تاريخية ..كازاخستان شنو في (البرد) دا؟
انا ما عارف الموضوع شنو؟.
القصة شن نفرها.
اتنين تلقاهم بتخابطوا في الشارع ..واحد فيهم يعفص ليك التاني لمن يجيب الدم.
وقت الناس يحجزوهم ..ويطلعوا ليك الزول (المسكين) زي شوال الفحم.
بقولوا للزول (الحقار) يا زول انت مالك مع الزول دا؟.
بقول ليهم واللـه انا ما قاصدو – انا قاصد لي زول تاني.
حالتك دي ما قاصدو.
طيب لو كنت قاصدو كان بتعمل ليه شنو؟.
فى زول مزارع ناس التلفزيون عملو معاه شغل.
المذيع قال يدخل عليه في الاسئلة (السخنة) طوالي.
المذيع قال ليه : البطيخ دا مشكلتو شنو؟.
المزارع قال ليه واللـه مشكلتو – البطيخ دا بعد ما نزرعه ونرويه ونتابعه بجوا ناس الجباية وبشيلوا نصو.
البطيخ دا اصلو ما عندو مشكلة غير ناس المحلية؟.
المزارع قال للمذيع نحن لو علينا البطيخ دا نزرع نصو (قرع).
عشان ناس المحلية وقت يجونا يشيلوا نص القرع.
في زول – من غير اي مناسبة.
الدكتور قال ليه عندك (بنكرياس).
الزول قال للدكتور – يا دكتور والبنكرياس دا حاجة كعبة.
الدكتور قال ليه البنكرياس ما كعب – لكن لو ناس (المحلية) شافوه …بشيلوه منك تاني.
الزول قال للدكتور هو ممنوع؟.
الدكتور قال ليه ابدا – بس ناس المحلية ديل ما خلوا ليكم حاجة غير (البنكرياسات).
واحد تلفونو ضرب.
عاين للرقم.
الرقم طلع غريب.
قال هسع دا يكون سيد البيت.
سيد البيت اصلو ما بضرب ليك من رقم معروف.
لا بد – ولازم يضرب ليك من رقم غريب.
ناس المريخ ديل…يسجلوا (عطرون).
قاعدين نقول ما في مشكلة.
يسجلوا (النعسان).
نقول ما عندهم قروش.
ظروفهم صعبة.
يرجعوا (تراوري) بعد العملو داك كلو – نقول قاصدين بس يحرجوا جمال الوالي ويوصلوا ليه رسالة.
يسجلوا المعز محجوب بـ (مليار ونص) بعد العمر دا كلو.
نقول عدم موضوع.
لكن تحصل انهم يلعبوا مباراة اعدادية مع الكازاخستاني دي يبقى عدم الشغلة ذاتها.
الكازاخستاني دا هسع فريق كورة وإلّا بتنجان.
الكازاخستاني دا طبيخ؟.
فول مدمس؟.
شارع في الحلة؟.
علبة هندسة؟.
اتنين مختلفين؟.
كازاخستاني شنو كمان؟.
كازاخستان فيها كورة كمان.
انتوا ناس خالد النعسان ديل عاوزين تشاركوا بيهم في معركة تاريخية ..كازاخستان شنو في (البرد) دا؟.
معسكر المريخ السنة دي زي الزول الما عندو قروش.
جزء في اديس ابابا.
وجزء في الدوحة.
وجزء في الامارات.
الفلس بعمل اكتر من كدا.
الفلس خلاكم حايمين تفتشوا في (الروابط).
هسع رابطة الهلال في الدوحة لو ما اتبرعت ليكم بـ (10) الاف ريال ناس عطرون ديل إلّا تبيتوهم القوا.
في البلد دي شغالين لينا (تحويل رصيد).
برة بتموها (روابط).
طيب (لجنة التسيير) عملت شنو؟.
لجنة التسيير الحاجة الوحيدة العملتها للمريخ – رجعت شيبوب من جوبا ..وسلمتو للكاردينال في قاردن سيتي.
انتوا عارفين الحكاية دي.
قلتها ليكم قبل كدا.
نابليون يقال ان ثقالاته تمثلت فى هوايته للتلصص من ثقب الباب على زوجات قادته.
يعني نابليون دا ما يعمل ليكم فيها خطير.
اما الملك فاروق فقد اشتهر بسرقته لادوات الموائد الفضية فى الاحتفالات التى كانت تقام له.
شفتوا الملك فاروق بكل ثروته وسلطته والعز العائش فيه.
تشرسل كان يتعمد تدخين السجائر فى حضرة زوجته المصابة بالسرطان فيعرضها ذلك للكثير من المتاعب و المهالك.
نوع دي عليكم اللـه يقولوا عليه شنو؟.
الخليفة المستعصم باللـه كانت ثقالاته متمثلة فى انه كان يبادل الشعراء مدحهم له ببضاعة من نفس النوع حيث كان يرد العطاء كلاماً.
من نفس الشيء.
هسع عليكم اللـه الكلام دا ما احسن ليكم من الكلام عن معسكر المريخ.
على الاقل دا كلام تاريخي.
ومعلومات حقيقية.
نمشي حتة تانية.
مصطفي سيدأحمد.
عادة الناس يتوقفون عند الراحلين في ذكرى رحيلهم كل عام.
عدا انت الناس هنا يتوقفون في كل حين ليحيوا ذكري رحيل ود المقبول .. كأن في ذكرى رحيلك هذا سلوى من (الحزن النبيل).
نمشي كبوشية.
كبوشية عديل كدا.
مبارك المغربي شهد لمنطقة كبوشية …المنطقة التي انطلقت منها اغنية الحقيبة.
كتب مبارك المغربي:
(لم يكن من الميسور معرفة تاريخ ميلاد محمد الفكي بابكر (ود الفكي) ولا مكانه وأن من الراجح أنه ولد بالبجراوية في كبوشية حوالي 1880م ميلادية في بيت معروف بالدين، فأبوه الفكي بابكر فقيه من حفظة القرآن وله مسجد كبير وخلوة، وأخوه الفكي أحمد صاحب الخلوة المعروفة بالبجراوية والمقيم بها حتى الآن وهو من قبيلة الجعليين ومن أقرباء الفنان الشهير عبداللـه الماحي.. التحق في سن باكرة بالخلوة وأقام فترة ليست بالقصيرة في موطنه الى أن تزوج ورزق بالبنين . كان طبعه فناناً ذا إحساس رفيع وذوق نبيل، وعلى الرغم من تحصيله الجيد بالخلوة إلا أنه كان يعرج على مجالس الغناء ينهل من فيضها ويروي روحه الظامئة الى الطرب والتواقة للحب والجمال… كان يختلس اللحظات التي يجلس فيها الى مطربي السافل بل يهاجر اليهم في كثير من الأحيان … وعندما علم أبوه الفقيه بذلك لم يرم الى تعنيفه وزجره بل حاول بكثير من التروي أن يلفت نظره الى التحصيل الديني … ولكن الفتى مع احترامه لأبيه وحبه للخلوة . كان شغفه للغناء أكبر من كل توقع … فجرفه التيار القوي ليصبح بعد حين رائد الغناء الأول بالسودان).
الكلام دا كلام مبارك المغربي – عشان ما تقعدوا تتغالطوا لينا ساكت.
نطلع.
انتوا شفتوا حكاية حسنين وعوضين.
احكي ليكم الحكاية واحكموا براكم.
جاء .. نفسه (مقطوع)… وجده يقف علي (الحافة).. هو معتاد علي الوقوف في (الحافة)… زهجان … وروحو في (ولاعة سجايرو).
(عوضين) … النفسو (مقطوع) .. قال لي (حسنين) الروحو في (ولاعة سجايرو).. شفت ليك زول مر بي هنا.
مالك .. ان شاء اللـه ما في عوجة يا عوضين؟.
في واحد خطف (موبايلي).
شكلو كيف ؟… وصفوا لي.
زول طويل اخضر .. متل طولك دا .. ومتل خضرتك تماما.
عيونه كيف؟.
عيونه متل عيونك ديل (زي قدحة التوم).
لابس شنو؟.
لابس (قميص) نفس قميصك دا (رمادي .. مقلم) … وجيب القميص مقطوع .. نفس جيب قميصك المقطوع دا.
حسنين .. بدأ يضايق …
الزول الخطف منك الموبايل .. شعرو كيف يا عوضين؟.
ما فيه شعر .. عندو (صلعة) زي صلعتك دي… صلعتو لو فكوها بتعمل ليها حكاية بتاعة (70) جلحة.
طيب يا عوضين .. ارتاح .. موبايلك برجع ليك.
يرجع وين؟… في حاجة بتروح في البلد دي بترجع.
كدا (روق المنقة) .. ووصف لي الزول بي رواقة.
الزول دا … لابس (نضارة) متل نضارتك دي ….. وفيه (فلقة) في رأسو .. نفس (فلقتك) دي يا حسنين.
لابس (بنطلون) .. نفس (بنطلونك) المكرهنا بيه دا.
انت يا حسنين بتلبس (جزمة) نمرة كم؟.
بلبس جزمة نمرة (46).
دي نفس النمرة البلبسها الزول الخطف مني الموبايل.
كمان اقول ليك حاجة.
قول .. اصلو اليوم دا ظاهر عليه ملخبط من الصباح.
الزول الخطف مني (الموبايل) روحو في (ولاعة سجايرو).
حسنين ما عرف يمشي وين؟.
يا عوضين انت (موبايلك) ماركتو شنو؟.
نفس ماركة الموبايل الشايلو دي يا حسنين.
وشغال بي ياتو نغمة ؟.
شغال بي (نغمتك) الشغال بيها دي ذاتها يا حسنين.
انت قاصدني انا يا عوضين.
ابدا واللـه … انا قاصد (الموبايل) الشايلو دا.
طيب ما تقول كدا من الصباح … ان بقت علي (الموبايل) هينة .. تصور انا من الصباح .. كنت فاكرك قاصدني انا.
………
ملحوظة : الزول وقت يكون عاوز ليه مع الزول التاني سبب ..ما بتلفت.
هوامش
فريق الرديف خسر امس في بورتسودان.
في الحالة دي طبعا ما عندك طريقة غير تقول تجربة مفيدة.
يعني ح تقول شنو؟.
سلك قالوا الركشة ضيعت عليه عرض الارسنال واتلتيكو مدريد.
يا سلك لو عاوز تصلح الحكاية قول عندك (رباط صليبي).
واللـه زول يعرفك ما في.
الركشة طلعت اخطر من (ضفر).
واحد شاطر ممكن يوريني الدوري الممتاز ح يبدأ متين؟.
المشكلة الممتاز بي الجهجهة حقتو دي يكون عندو رعاية.
سوداني رعت الدورة المدرسية ..ظهرت نتائج رعايتها.
الممتاز السوداني بي ناس اسامة عطا المنان – لا ترعوه ولا حاجة.
خلوه (سليقة) ساكت.
رعاية شنو كمان.
الممتاز دا رطل لبن كتير عليه.
……..
عاجل : الخريف السنة دي الظاهر عليه ح يكون قوي …الولاية الى الآن ما استعدت ليه.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *