بابكر سلك : تاني جابوا سيرة الركشة

بابكر سلك : تاني جابوا سيرة الركشة

> المحيرني المدافع الجابوهو ناس الهلال ده
> انتوا جادين يا روشا ؟؟؟؟
> قال الصخرة قال
> دي صخرتكم مع الناس!
> صدقوني الزول ده لو لعب ضدنا
> العقرب بتشقلب كلو تلاتة دقائق
> ايها الناس
> استطاع مجلس التسيير أن يحافظ على عظم الفريق وعظمته
> جمال سالم والمعز محجوب وعلولو وأمير ورمضان ومصعب وجابسون وراجي وبكري وكوفي وأوكرا وغيرهم
> تخلص من ديديه واستبدله بمدافع محترف وتخلص من أيمن سعيد الذي بدأ العد التنازلي منذ بداية الدورة الثانية للموسم الماضي
> أضاف من الوطنيين مكاسب كبيرة
> استعاد عنكبة المشاغب وأضاف النعسان هداف التأهيلي وعطرون الأسد
> يبقى مجلس التسيير استطاع أن يحافظ على قوة الفريق التي ورثها من المجلس السابق
> وأضاف إليها بعض الأسلحة
> تخلص من بلة والباشا وزغبير
> ويمكن تسعين في المية من الجمهور تتفق مع لجنة التسيير في من تخلص منهم
> لان الجمهور لايذكر آخر مرة شاهد فيها الباشا او بلة او زغبير
> وصعد المجلس شمس الفلاح
> وفي تقديري إنه أحرف طرف يمين في شرق ووسط إفريقيا
> دحين شرق ووسط إفريقيا دي قورماهيا موش فيها؟؟؟
> طيب وكت فيها
> كيف مدرب قورماهيا يصرح بأن الهلال أفضل فريق في شرق ووسط إفريقيا وهو غلب الهلال في ثغرنا الباسم ؟؟؟
> كمان الشتل بقى شتل مدربين أجانب يا محمد عبدالماجد؟؟؟؟
> غايتو يمكن مدرب قورماهيا قال الهلال أفضل فريق في شرق ووسط إفريقيا ما شال سيكافا
> كده معقولة
> لكن أفضل فريق في سيكافا دي كتيرة
> أمال الفرق الشالت سيكافا مرة ومثنى وثلاث وماشة على رباع
> ديل يبقوا شنو ؟؟؟
> التاريخ يشهد لمارين الصومالي والهلال السوداني انهما فشلا فشلاً كبيراً في الحصول على بطولة سيكافا
> ويمكن مارين الصومالي يكون أفضل حالاً من الهلال
> لأنو الصومال ما استضافت بطولة سيكافا
> عكس السودان الاستضافها خمس مرات
> منهم تلاتة مرات شارك فيها الهلال وطلع بقد القفة
> في ناس القفة دي ما بعرفوها
> عشان نسهل ليهم
> بقد كيس جيلاني
> وبالنسبة لأولاد ميكي
> بقد كيس هدايا
> ده غير السبع مرات الشارك فيها الهلال خارج السودان
> وكالعادة عاد للسودان كما عاد من بورتسودان
> بخفي حنين
> بالنسبة لاولاد ميكي خفي حنين دي يعني الشوز بتاعت عمك كايند
> الهلال كايند وحنين جداً ياروشا
> ماعارفكم دايرين تصوروهو للناس أسد وبعبع ليه؟
> المهم
> موضوع الركشة ده ما داير يطلع من راسي
> الزول السايق الركشة جاني زيارة
> قلت ليهو ياخ إنت زول عديم عشرة
> قال لي كيف؟
> قلت ليهو ياخ دقشتني في صدري
> ولما وقعت في الواطة دي طلعت لي في رجلي
> كان تتفاداني
> ضحك وقال لي
> والله يا خال أنا اتفاجأت بالضربة
> ولما إنت وقعت اتفاديتك
> عشان اتفاداك مشيت مشوار والله بي خمسطاشر جنيه ما بمشيهو
> وبعد ده لقيت رجلك في التلتوار البهناك
> انت وقعت ولا انكشحت يا عمك؟ !!!!
> قلت ليهو الله أكبر عليك
> أريتني لو ما شطبت البلاغ
> أيها الناس
> بمناسبة الركشة
> الجماعة يخيل لي تاني رجعوا لي حركاتهم
> ومشوا لي ابو ماسورة
> ابو ماسورة الكسر لينا طمبل وكليتشي وكتل ايداهور
> وطشش وارغو
> المرة دي قالوا ليهو شوف يا ابو ماسورة
> بالحتة الفيها الحديدة
> بكري بابكر ما تفرز
> كابو ربنا مرقو لأنو الباء بعد الكاف
> لكن لو كان اسمك باكو يا هيثم
> كان اتكاملتك أمجاد يا حبيب
> ربنا مرقك
> عشان كده ما استغربت لما حصل حادث لي بكري وحادث لي
> نحنا فكِينا على الله ده
> واتفكفكي
> ايها الناس
> يوم سبعة وعشرين يوم تتويجنا بالبطولة الفاتت
> وضربة البداية لبطولتنا الجديدة ان شاء الله
> نجي كلنا
> العز اهل
> نعز مريخنا ونحتفل بالبطولتين وكأس الشهيد فتحي خليل
> المريخ عريس بطولات الموسم الفات كلها
> ونغني كية للعزابة
> ايها الناس
> «إن تنصروا الله ينصركم»
> اها
> نجي لي شمارات والي الخرتوم
> كان شفت يا والينا
> ام درمان كلها تردد جد لينا وجدلينا
> السوق انكشف لينا
> وبدت تظهر معالم مدينة
> وكان شفت يا والينا
> القصيرية ظهرت لينا
> كانت خلف الشوالات والقنا رايحة لينا
> تصدق خمسة وعشرين سنة يا والينا
> ودينا على الله لي ترزي فيها يخيطها لينا
> وراح علينا
> بالناس الفرشت في الزلط وفرشت في ريسينا
> بي تصاديق المحليات الملت السوق طبليات علينا
> عشان خمسين جنيه يا والينا
> كانوا بصدقوا لأي زول يفرش يخلي بسمة المدينة حزينة
> واول يوم نعرف انو مظلة المحطة الوسطى كسروها علينا
> تصدق يا والينا
> الخواجات كانوا بجوا سوق ام درمان يتفرجوا على السعف في زنك النسوان
> وعلي سن الفيل وجلد الاصلة كمان
> ويصوروا ابداع اهل السودان
> اسي يدخلوا تلاتة خواجات سمحين وسمان
> يمرقوا من السوق بهناك ضعاااف لاتعرفهم البان ولا تعرفهم ألمان يا مان
> بركة السوق ام درمان بدا يرجع لينا زي زمان
سلك كهربا
ننساك كيف والكلب لي اسي ما مصدق انو ده سوق ام درمان.. قال الخوف في اول عيد يقولوا ليكم معاكم الكاميرا الخفية..غايتو لو عملوها يا بوبي كلنا بنقول هوووووو ونعضي من طرف
والي لقاء
سلك

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *