محمد عبد الماجد : انتوا وقت عندكم (عقد) زي دا بتسلقوا (المواسير) ليه؟

(العقد) الذي نشرته صحيفة (الصدي) لا يصل حتى مرحلة (التعارف) بين الاهل ناهيك ان يبلغ مرحلة (الخطوبة)
الجقليبة البتعملوا فيها لي شيبوب – لو عملتوها في (تحويل الرصيد) كان هسع عملتوا ليكم (طابق) اضافي في استاد المريخ
عليكم الـله يا ناس المريخ لو لقيتوا ليكم زول يصل بي عقدكم دا الفيفا – كلموه يشيل لينا معاهو عقد بكري المدينة
الطريف وعلى طريقة بصمة علاءالدين ..الشاهد على عقد المريخ مع شيبوب طلع (مصطفى توفيق صالح)
في كل يوم يثبت المريخ واعلامه تناقضاته الكبيرة.
اصلو ما عندهم مبدأ.
بس شغالين مع مصلحتهم.
امس الجماعة ديل جابوا ليهم (ورقة حساب) من سنة 1811 قبل ما يفتحوا الخرطوم وقالوا دا عقد (شيبوب).
الناس ديل ما عندهم زول كبير.
ما فيهم زول يقول ليهم (الجرسة) البتعملوا فيها دي غلط.
شيبوب خلاص راح – اركزوا ساكت.
البهدلة البتعملوا فيها دي ما صاح.
البكا ما برجعو تاني.
اتعوضوا الـله ساكت.
الجقليبة البتعملوا فيها لي شيبوب – لو عملتوها في (تحويل الرصيد) كان هسع عملتوا ليكم (طابق) اضافي في استاد المريخ.
الجقليبة دي اعملوها في حاجة تستفيدوا منها.
حاجة فيها رجاء.
استفيدوا من زمنكم – موضوع شيبوب خلص.
الزول دا هسع لو قريب بيلعب في الدوري التونسي.
تناقضات كبيرة وعجيبة يقدمها لنا اعلام المريخ ومجلسه.
بعد شكوى المريخ في لاعب هلال كادوقلي (طونق) – ظهرت بنفس التفاصيل قضية اللاعب (الوك).
ليحدث التناقض الكبير عند اعلام المريخ ومجلسه الذي كان يدافع عن (الوك) بنفس البنود التى كان يدين بها (طونق).
وكأن الاقدار رتبت لأن تشربهم من نفس (الكاس).
المريخ واعلامه الذي كان يسخر من عقد الهلال مع بكري المدينة الذي وقع خارج مكاتب الاتحاد العام اخرج امس عبر صحيفة (الصدى) عقد المريخ (المضروب) مع لاعب شبيبة القيروان شرف شيبوب.
العقد كان في 8 يونيو 2014 يعني قبل عقد الهلال مع بكري المدينة.
عليكم الـله يا ناس المريخ لو لقيتوا ليكم زول يصل بي عقدكم دا الفيفا – كلموه يشيل لينا معاهو عقد بكري المدينة.
عقد بكري المدينة مثبت بالصورة وما فيه شبهة (تزوير) وقبض فيه بكري المدينة مقدم عقد 800 مليون جنيه…ما (50) مليون جنيه.
(العقد) الذي نشرته صحيفة (الصدي) امس مع شيبوب لا يصل حتى مرحلة (التعارف) بين الاهل ناهيك ان يبلغ مرحلة (الخطوبة).
العقد مكتوب في (ورق مناديل) وضارباه ليك (مطرة).
هذا العقد لو كان في (بطيخة) بيفقد صاحب البطيخة اهليته.
عقد المريخ (الوهمي) مع شيبوب ذكرني ليك (كراس الجرورة) البيكتبوا فيه طحنية بـ 4 جنيه – صابونة بـ 3 جنيه – زيت بـ 6 جنيه.
بعدين انتوا (الشافع) بتاع سنة اولى الكتب ليكم العقد دا منو يا ناس المريخ – المثلكم منو في هذا العقد؟.
زول كبير ما عندكم.
خط رديء بالشكل دا عمري ما شفتو.
والـله لو دا عقدكم – ليه حق شيبوب يطير.
ما تقولوا لي الفريق طارق كان بمثل المريخ في العقد – عشان الفريق طارق لو بعمل (عقود) زي دي مفروض تراجعو اعماله كلها.
الطريف وعلى طريقة بصمة علاءالدين ..الشاهد على عقد المريخ مع شيبوب هو (مصطفى توفيق صالح).
الاسم ثلاثي.
انت يا مصطفى توفيق الحاجات دي ما بتطير منها.
عقد شاهد فيه مصطفى توفيق – باقى ليكم فيه فايدة.
دا البصدقوا ليكم منو؟.
عشان ما سألوكم في (البصمة) – طالعين لينا تاني بي عقد (مضروب) مع اللاعب شرف شيبوب.
مزمل ابوالقاسم امس كتب في عموده : (نتوقع أن يتعرض العقد المذكور إلى حملة تشكيك، ولا نستبعد أن يشبهه البعض بما حدث في قضية بصمة علاء الدين الشهيرة، علماً أن علاء نفسه وقع عقداً مماثلاً مع نادي المريخ ، وقبض ثلاثمائة مليون جنيه، لكنه تمكن من تجاوزه والتوقيع للهلال، مستغلاً عدم اعتراف الاتحاد السوداني بمثل تلك العقود).
هسع في زول سألك من (البصمة).
الفي رأسو (بطحة) براهو بقول كدا.
متعودة دائما.
الحمدللـه براكم بقيتوا تصلوا لهذه القناعة.
طيب وقت بتعرفوا الحاجات دي …الازعاج لزومو شنو؟.
والـله بي حركاتكم دي مفروض يفتحوا فيكم بلاغ (ازعاج سلطات).
غايتو موضوع شيبوب دا داخل ليك في المريخاب دخلة كعبة.
الجماعة ديل ظاهر عليهم النوم ما قاعدين ينوموه.
الاكل مارق من نفسهم.
الناس ديل غلبهم الصبر ..ما قادرين يثبتوا – كل يوم والتاني بطلعوا ليهم بي حاجة جديدة في موضوع شيبوب دا.
بعدين انتوا يا مزمل ابوالقاسم وقت عندكم (عقد) زي دا ..(التسلق) في (المواسير) لزومو شنو؟.
دا عقد يتسلقوا معاهو في (المواسير).
في داعي تخلوا (الولد) يقفز ليكم من الطابق الرابع وانتوا عندكم عقد بهذا الشكل.
اصلو ما كان في لازم للحوامة عبر (4) مطارات ومن غير جواز سفر وانتوا عندكم (عقد) على هذا النحو مع اللاعب شيبوب.
الجرسة ليه وقت متعاقدين معاهو؟.
الصقر ان وقع كترت البتابت عيب.
والـله ما قاعدين نرضى ليكم الحالة دي.
العقد الذي نشرته صحيفة الصدى امس – عقد يدين المريخ ..ولو وصل للفيفا يمكن ان يتعرض المريخ للعقوبة.
بل هو عقد سوف يعرض المريخ لعقوبة حقيقية من الفيفا لو ملك المريخ الشجاعة ووصل بهذا العقد الى الاتحاد الدولي لكورة القدم.
هذا العقد يثبت ان المريخ وقع عقدين مع شيبوب – عقد لاعب (هاوي) وهو العقد الذي كان ساريا وتم في الاتحاد العام.
وعقد آخر هو عقد لاعب (محترف) – يريد المريخ عبره ان يحفظ حقوقه في الوقت الذي يلعب فيها بحقوق اللاعب.
هذه ادانة واضحة.
كيف يتم التعاقد مرتين مع لاعب؟..هذه مخالفة تعاقب عليها الفيفا.
وكيل شيبوب ونادي شبيبة القيروان لو وصل لهم هذا (العقد) ..فانهم يملكوا ان يدينوا المريخ به.
ناس خالد بدرة ديل عارفين الشغل.
عارفين القوانين.
ديل لا فيهم اسامة عطا المنان ولا سمير فضل.
لذلك ننصح المريخ ان ينسحب كليا عن قضية (شيبوب) – لأن مخاطرها على النادي سوف تكون كبيرة.
على المريخ ان يقفل ملف شيبوب – هذا الملف اثبتوا فيه فشل كبير.
في كل يوم يقدم لنا اعلام المريخ (مسرحيات) جديدة في قضية شيبوب تثبت ان الضربة كانت قاضية للمريخ.
الناس ديل جابوه من (جوبا) بعد ان قفز ليهم من الطابق الرابع وحام معاهم عبر (4) مطارات – وعملوا ليه مهرجان في الخرطوم.
بعد كل هذا جاءوا وفرطوا في اللاعب ليسلموه لرئيس نادي الهلال لينتقل اللاعب من بعد الى شبيبة القيروان.
القعد الذي نشرته صحيفة الصدي امس لا يرقى لمرحلة التعليق عليه – إلّا اذا كان ذلك للسخرية من العقد والضحك في اعلام المريخ.
شيبوب سوف يعود في مايو القادم – ان شاءالـله لتشاهدوه بالزي الازرق الكامل.
ان كان شيبوب يفعل فيكم كل ذلك وهو في (شبيبة القيروان) لمن يلعب في الهلال ح تعملوا شنو؟.
والـله إلّا تشوفوا ليكم بلد.
الناس ديل الشغلة غلبتهم.
بقوا ينشروا في العقود (الوهمية).
الايام دول.
مزمل ابوالقاسم – الآن في كل يوم يقدم لنا تناقضاته التى يجمع فيها بين الشرق والمغرب.
مزمل ابوالقاسم في قضية (طونق) كان في الاتجاه الذي يقول ان تسجيل اللاعب غير صحيح.
في قضية (الوك) بنفس التفاصيل مزمل ابوالقاسم يقول ان تسجيل الوك صحيح.
في قضية بكري المدينة مزمل ابوالقاسم يقول عقد الهلال مع بكري المدينة بلوه واشربوا مويته.
في قضية شيبوب مزمل ابوالقاسم يقول ح نمشي الفيفا.
يا مزمل ابقى ليك على حالة واحدة.
مزمل ابوالقاسم كان يكتب قبل سنوات عن الاعارة (الوهمية) – نقول له بذات الطريقة ان عقد المريخ مع شيبوب عقد (وهمي).
قلنا ليكم الهلال حقو بيظهر فيكم.
بيبين في (كشوفاتكم).
من غير تعب ومن غير جهد قاعدين تدينوا في نفسكم – وتوضحوا في تناقضاتكم.
شكرا ليك يا شيبوب فقد كشفت لنا كيف يدار المريخ.
……
ملحوظة : انتوا مدني الحارث دا في المجلس وإلّا في المعارضة؟.
هوامش
الزول دا شايت وين؟.
شن خبرو؟.
محمد سيد احمد واحد يكفي.
يا مدني الحارث بعد العمر دا عاوز تبقى لينا محمد سيد احمد آخر.
الحمدللـه الذي نصر الهلال في شيبوب.
نفس العقد الذي كان يسخر منه المريخاب في بكري المدينة طلعوه الآن في قضية شيبوب.
عقدكم دا بلوه واشربوا مويتو.
ولو عندكم شجاعة اصلوا بيه الفيفا.
لو ما عاقبتكم الفيفا على خداع شيبوب واللعب عليه …تقولوا نحن غلطانين.
اللعب بمشاعر الجماهير وخداعها امر ما جميل.
ما تضللوا الناس ساكت.
ما تخدروهم بي حاجات (وهمية).
شوفوا ليكم شغلة تانية.
موضوع آخر.
موضوع شيبوب دا ما عندكم فيه (سطر).
الجماعة علقوا ليك في شيبوب.
قام تاني جاب سيرة البحر.
الناس دي اصلو ما بتقتنع بالخسارة.
اصلو ما بعترفوا.
البكا ما بجيبو لي.
انتوا مصطفى توفيق اتخصص في المواضيع دي.
الزول دا بيبصم.
وبوقع كمان.
بمضي وببصم يا بي.
بيعمل الاتنين.
……….
عاجل : تراوري اصلو ما غلطان عليكم.

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *