الفات جبرا : الحكاية طولت شديد

الفات جبرا : الحكاية طولت شديد

نشر هذا المقال في )الرأي العام( قبل خمسة أعوام بمناسبة مرور عام على (الكسرة الثابتة) يعني هسه ليها (ستة سنين) ، فقد تنقلت معي هذه (الكسرة الثابتة) من صحيفة (الرأي العام) إلى (صحيفة الخرطوم) ومنها إرتحلت معي إلى صحيفة (الأهرام اليوم) ومنها صاحبتني إلي صحيفة (التيار) وها هي الآن معي بصحيفة (اول النهار) يعني (خمس جرايد والخط ضائع) فإلى المقال الذي كان بعنوان (الخط إتسرق يا رجاله) :

الخطوط أنواع وأشكال .. فى الكتابة عندك خط الرقعة وخط النسخ وبقية الخطوط . وفى الكوره عند خط ستة وخط تمنطاشر وخط التماس وفى الجغرافية عندك كمان خط الإستواء وخط قرينتش وخط الطول وخط العرض وبرضو عندك خطوط تانية زى خط المواصلات وخط الموبايل وخط الفقر وخط المشاة
جميع هذه الخطوط عزيزى القارئ تشترك فى خاصية واحدة رغم تباينها .. هل تدري ما هى هذه الخاصية ؟ وما الذى يجمع بين خط تمنطاشر وخط الإستواء وخط قرينتش ؟ سوف تشحذ ذهنك عزيزى القارئ ولو أديتك ستين سنة عشان تفكر أنا متأكد تماما أنك سوف تفشل فى إيجاد هذا الشئ المشترك بين كل هذه الخطوط .
طيب أنا أوفر عليك الستين سنة وأقول ليك الإجابة وهى أن جميع هذه الخطوط لا يمكن أن تسرق !! يعنى حصل يوم شفتوا ليكم (خط قرينتش إتسرق) وللا (خط مشاة إتسرق) وللا أى واحد من الخطوط دى زول (نشلو ونام بيهو) ؟ لكن طبعن لأنو نحنا عندنا ناس يسرقو (الكحل من العين) ويسرقو ليك خط (سته ذاااتو) لحدت ما (الحكم) يودوهو الإنعاش من المفاجأة ، فقد تمت سرقة خط (جوى) إذ قامت جهه ما بسرقة خط (الخرطوم- هيثرو) الجوى (حق الهبوط والإقلاع) وباعته (كسر) لأحد (الشركات المعروفة) !!
فجأتن اكتشف أحد المسئولين إختفاء أحد أهم خطوط الطيران لديه فصاح بأعلى صوته :
– خط (الخرطوم – هيثرو) إتسرق يا رجاااالة !!
هنا تجمع الجيران وبعض المارة (بتاعين الشمارات) وأخذوا يهدأون من روع المسئول
-(صوت 1) : يا سعادتك كدى فتش براااحه بررراحه إحتمال تلاقيهو !
– رد : ألاقيهو دى شنو؟ الخط ده أنا مفقود وأنا ما شايفو ليهو تلاته أربعه سنين !
-(صوت 2) : وإنتو يا سعادتك نايمين التلاته أربعه سنين دى وجايين تسألو عنو هسه ؟
– رد : هى لاكن نحنا قايلين فى زول ممكن يسرق ليهو خط طيران ويبيعو؟
-(صوت 3) : والله يا سعادتك عندنا ناس يسرقو ليك الجنريتر والحفلة شغالة !
-(صوت 4) : مش إحتمال يعنى يمكن تكونو إتزنقتو كده مرة لى قروش وقمتو مشيتو بعتوهو ؟
– رد : إتزنقنا وبعناهو دى شنو؟ مش كان على الأقل تكون فى مبايعة موجودة عندنا مثلاً
-(صوت 5) : أها يعنى يكون الخط ده مشى وين يعنى؟
للإجابة على تساؤل (الصوت الأخير ده) البقول الخط مشى وين؟ نقول ليهو إنو (أمنا الحكومة) ما سكتت على (السرقة العارفاها ليها أربعة سنين وشوية) وقامت طواااالى شكلت لجنة تحقيق عشان تحدد الجهات المتورطة وأعطت اللجنة دى الحق فى إنها تتعاقد ليها مع (متحري إنجليزى خاص) عشان يتابع الموضوع في بريطانيا ولمن يعرف الناس (السرقوا الخط) يقوم يفتح ليهم بلاغ فى (القسم الجنوبى الإنجليزى) ويختو الخط (معروضات) !
عليكم الله دى مش حاجه تحير؟ لجنة شنو؟ وتحريات أيه؟ وبتاع مين؟ هسه الموضوع ده عاوز ليهو لجنة؟ هو فى (كم زول) فى السودان ممكن يبيعوا ليهم (خط طيران) ؟ وكم زول ممكن يكون عندو أوراق ومستندات (تقنع المشترى) بإنو هو شخص مخول ليهو يبيع الخط ؟
وبعدين المشكلة وين؟ هى كيمياء .. الحكومة (إتنشلت) ووجدت الحاجه النشلوها منها (قاشر بيها زول تانى) .. خلاس تخاطب (الزول القاشر ده) بصورة رسمية وقانونية وتطلب منو إنو يوريها (الخط المسروق) ده جابو ليهو (ياتو حرامى) !!
غايتو في ظل التباطؤ والتلكؤ في التعامل مع هذه القضية ما على الشعب السودانى الفضل إلا أن يمتثل إلى المقولة الصينية القديمة التى تقول : (يهاو فينج زهاو فينج) وترجمتها الحرفية (عليهو العوض ومنو العوض) !
كسرة :
نعيد نشر هذا المقال مذكرين السيد وزير العدل (الأخ الدكتور عوض الحسن النور) بتوجيهه في سبتمبر من العام الماضي، (يعني قبل خمسة شهور) بفتح بلاغات ضد المتسببين في فقدان الخطوط الجوية السودانية لحق الهبوط والإقلاع بمطار (هيثرو) .. لأنو شايفين الحكاية طولت (شديد) وكده!!!!!!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *