داليا الياس : إحساس إنساني مجيد

داليا الياس : إحساس إنساني مجيد

الحب في الجوف ما داير عيد!
لا ليهو طقوس.. لا لون.. لا يوم..
دايماً إحساسك في تجديد
لا بينكم نوح.. لا جور.. لا لوم..
مفروض يوماتي غرامنا يزيد
يملأ الأرواح أفراح ونجوم..
الريد الصادق بالتأكيد
بيضلل فينا كأنو غيوم..
رغم الأحزان تلقاكا سعيد
تتبدد أي جراح وهموم..
والشوق جواكا مداهو بعيد
ويساهر بيك ما تضوق النوم..
ولو زولك سابك مرة وحيد
تصبح ولهان.. شقيان.. مكلوم..
وكأنك إنت البي التحديد
في الدنيا برااااك ياخي المظلوم..
الحب إحساس إنساني مجيد
علمنا فنون.. وآداب.. وعلوم..
موجود جوانا في أي وريد
وإن شاء الله فضايلو علينا تدوم..
ونعيش أيامنا محبة وريد
وأجمل إحساس بيناتنا يحوم..
نحن الإخلاص رابطنا شديد
وبينا التقدير.. والهوى بالكوم.. .
ما محتاجين بدعة (تهويد)
تفسد أخلاقنا ونبقى خصوم..
ونعيش الحب في معنى مريض
ونبيع في غفلة نفوس وجسوم..
والناتج يصبح طفل شريد
والغلطة تكون غلطتنا عموم..
فكينا حبالهم من الإيد
واتربوا على الأفكار الشوم..
لو كلنا نطري (رقيب) و(عتيد)
ما أظن يغشانا جحيم وسموم..
والريد لو سامي.. نبيل.. وفريد
ما ببقى نتيجتو طفل محروم..
الحب يا ناااااس ما داير عيد
لا ليهو طقوس.. لا لون.. لايوم!!
استدراك:
كل يوم يمضي من حياواتنا يحتاج للحب.. وكل عمل نقوم به على ذات النسق يجيئ في تمام إيجابيته ونبله.. لأنه (معمول بحب).

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *