محمد عبد الماجد : جدول مباريات الممتاز السنة دي زي الأمطار (توقعات) ساكت

محمد عبد الماجد : جدول مباريات الممتاز السنة دي زي الأمطار (توقعات) ساكت

الراحة ممكن تكون إذا كانت أندية الممتاز عددها (فردي) .. راحة في دوري عدد أنديته (زوجي) أول مرة نسمع بيها عندكم
تلبس ليك جلابية (خطيرة) كدا ..وتقول تمشي عقد ناس الأمين ود الفتريتة ..تلقى نفسك بي جلابيتك بتلعب في الدافوري بتاع الحلة
ديل بعد (القرعة) قعدوا يحولوا في المباريات على كيفهم ..ينقلوا ليك الأسبوع السابع في الرابع ..ولا في زول بيسألهم
هسع نحن بي نفس الفهم ..عاوزين نقول لناس اللجنة المنظمة أنتوا برمجة الممتاز دي واضعها ليكم (ثعبان)

الزول (الروسي) ما فاهم أي حاجة.
قاعد متل (خليل ود الكوتن).
خليل ود الكوتن دا عليكم اللـه ما تسألوني منو.
أنا ذاتو ما عارف موضوعو شنو؟.
لكن يتخيل لي دا الزول الزاد الموية.
الروسي الدنيا دي ما عندو فيها غير (نضارة) وشاحن موبايل.
شاحن الموبايل ناس الحلة معذبنو فيه.
أنتوا ما تعملوا ليكم شاحن.
الروسي دا ساقوه ليك (حلة) ..(ملولوة لولوة) شديدة خلاص.
زي ميزانية السودان.
حلة شوارعها عجيبة.
يكون ماشي ناس الجيران يلقى نفسو في مدرسة الأساس.
يدخل يحضر ليه (حصة) يعمل شنو عاد؟.
شوارع متداخلة فوق بعض.
الشارع دا داخل في الشارع دا.
يكون ماشي ناس عيسي يلقى نفسو عند ناس كلتوم.
ما بقدر يقول حاجة ..غير يشيل الفاتحة مع كلتوم …عندها قريبها اتوفى.
يقول ليها أنتي يا كلتوم قالوا عندكم قريبك اتوفى ..واللـه ما سمعت بيه إلّا قبل شوية…وقلت أحسن أصلك طوالي.
أحسن من يطلع ساكت..والدرب جابو الليلة.
حلة شوارعها زي السلم والثعبان.
تكون ماشي ليك في شارع في أمان اللـه كدا ..تلقى نفسك في (بص الوالي).
من غير ما توقفو.
ولا تأشر ليه.
ولا تركب.
حلة ملخبطة شديد.
حلة من لخبتطها ..تمشي الدكان عشان تجيب ليك (طحنية) – تلقى نفسك راجع ليك بي (عدس).
بدون مناسبة كدا.
تكون ماشي تجيب ليك (كهرباء).
تجيب ليك (بطيخة) ..وتجي راجع.
في علاقة بين الكهرباء والبطيخ.
كمان ناس الكهربة ديل ما يقوموا يسمعونا ويدخلوا لينا (البطيخ) في فاتورة الكهربة.
حلة ..أصلو ما شفنا جنسها دا.
تلبس ليك جلابية (خطيرة) كدا ..وتقول تمشي عقد ناس الأمين ود الفتريتة ..تلقى نفسك بي جلابيتك بتلعب في الدافوري بتاع الحلة.
قلت ليكم (حلة) ملخبطة شديد ما صدقتوني.
قعدتوا تغالطوا.
جنكم (غلاط).
السنة كلها تغالطوا.
الروسي دا جابوه الحلة الملخبطة دي ..وما مخططة.
الروسي عاين للحلة سمح وقال ليهم في القصة الشهيرة ومعروفة ..أنتوا حلتكم دي مخططها ليكم (ثعبان)؟.
الكعوجة دي إلّا ثعبان.
هسع نحن بي نفس الفهم ..عاوزين نقول لناس اللجنة المنظمة أنتوا برمجة الممتاز دي واضعها ثعبان.
شنو مباراة في الأسبوع السابع ..يجيبوها ليك في الأسبوع التاني.
ومباراة في الأسبوع التاسع يلعبوها ليك في الأسبوع السادس.
الغريبة اللخبطة دي كلها عملوها عشان صالح فريق واحد.
كلها عملوها للمريخ.
المريخ كان يفترض أن يلعب مع هلال ومريخ الفاشر في الأسبوع السادس والسابع ..جابوا ليه المباريات دي ليلعبها في الأسبوع الثالث والرابع.
مباراة المريخ أمس مع الأمل مفروض تكون في الأسبوع التاسع جابوها ليه في الأسبوع الثامن.
كدا بدون مناسبة.
نحن ذاتو بقينا ما فاهمين أي حاجة.
ما عارفين نحن في ياتو أسبوع.
المريخ هسع لعب (8) مباريات ..والهلال لعب (6) مباريات فقط.
حاجة ما مفهومة.
ما يحدث في أمر (البرمجة) هذا ..(فساد) إداري.
ما تقولوا لي (قرعة) وكلام زي دا.
ديل بعد (القرعة) قعدوا يحولوا في المباريات على كيفهم ..ينقلوا ليك الأسبوع السابع في الرابع ..ولا في زول بيسألهم.
ولا في زول بقول ليهم حاجة.
خلوا نقل الكورة وبقوا ينقلوا المباريات.
يدخلوا ليك أسبوع في أسبوع.
في دوري هذا العام ..ممكن فريق (10) يوم ما يلعب مباراة ..وممكن فريق في الـ (10) يوم دي يلعب تلاتة مباريات.
أندية الممتاز هذا العام (18) فريقاً ..مع ذلك في كل أسبوع في راحة لي فريقين.
دي سمعتوا بيها.
الراحة ممكن تكون إذا كانت أندية الممتاز عددها (فردي) راحة في دوري عدد أنديته (زوجي) أول مرة نسمع بيها عندكم.
هذا التداخل وتلك (المزاجية) في ترتيب وبرمجة مباريات الدوري الممتاز بتلك الصورة يمكن أن تتضرر منها أندية.
ويمكن أن تستفيد منها أندية.
تغيب من تلك البرمجة مبدأ عدالة المنافسة ..ويغيب حتى شرفها ..لأن هناك نادي يمكن أن يلعب مباراة متقدمة فيفقد لاعب.
ويمكن أن تتأخر مباراة لأحد الأندية فيستفيد من ذلك بفك أحد لاعبيه من الإيقاف أو حتى من الإصابة.
البرمجة يجب أن تكون معروفة ومعلومة من بداية المنافسة ..لا يعقل أن تضع البرمجة هكذا بالقطعة.
هذا الأمر يغيّب (العدل) من المنافسات بشكل نهائي.
من الظلم أن تلعب أندية في ملعبها أكثر من أربع مباريات متتالية داخل أرضها ووسط جمهوره.
ومن الظلم كذلك أن تلعب أندية أكثر من أربع مباريات خارج ملعبها.
استمرار الخسارة وتتابعها يمكن أن يحبط الفريق ويمكن أن يطيح بالجهاز الفني على الأقل.
هذه البرمجة لا أعرف كيف قبلت بها الأندية وكيف صبرت عليها.
مباريات الممتاز أصبحت زي الزول العاوز يعرس ..وما قادر يحدد يوم الزواج.
كل يوم يحدد ليه تاريخ.
آخر حاجة لمن يقنع ..يقعد يقول ليك عرسي في العيد.
ويجي العيد ويفوت وما تشوف ليك أي (حنة).
أصبعو ما يحننو.
برمجة الممتاز هذا الموسم متل (الأمطار)..المباراة ما معروفة متين؟.
نحن بقينا شغالين معاكم زي ناس الإرصاد.
شغالين معاكم (توقعات).
توقعات ساكت.
يعني ممكن نقول ليكم (يتوقع) أن يلعب الهلال غداً أمام مريخ كوستي.
لكن مباراة الهلال بعد هذا الأسبوع – ما بقدر (أتوقعها) ليكم.
يا جماعة أصلو ما معقول ..في أسبوع واحد تكون في مباراة من الأسبوع السابع ..ومباراة من الأسبوع التاسع.
اللجنة المنظمة التى وضعت هذه البرمجة مفروض يجلدوها في ميدان عام.
اجلدوهم لينا عديل كدا.
نحن فهمنا كمل معاهم.
عليكم اللـه هو نحن ناقصين من (الفساد) – عشان تفسدوا لينا كدا على عينك يا تاجر.
فقد الدوري إثارته ..وبقت مبارياته (مجهولة) الهوية.
وأندية الممتاز مع ذلك راضية ..وما قالت شيء.
ما عارف الكاردينال دا عامل ليه (كسكتة) على شنو؟…وقت بفوت حاجات زي دي.
يا الكاردينال (الكسكتة) دي ألبسها لينا فوق رأي.
ما تلبسها لينا ساكت كدا.
………..
ملحوظة : شغالين لينا زي المطرة بس.
هوامش
ضربة الجزاء التى منحها الحكم أمس للمريخ غير صحيحة.
وما عندها علاقة حتى بـ (جدعة التماس).
ضربة الجزاء حسبها المساعد الأول.
يا زول أنت ما تخليك في (تسللك) ..مالك ومال (ضربات الجزاء).
دي ما شغلتك.
ما تقعد تنظر لينا ساكت.
المريخ بمستواه دا ..ما بمشي لي قدام في البطولة الأفريقية.
فريق نجمو الأول بقى علي جعفر ..تفتكروا ح يمشي وين؟.
جمال سالم أي كورة معكوسة بمسكها وبفكها.
تقول شغال في (التأمينات).
مهاجمو الأندية يجب أن يلتفتوا إلى ذلك.
الزول دا بفك.
حتى الكورة التى لا تشكل خطورة على مرماه بفكها.
الهلال غداً يلعب مباراة صعبة أمام مريخ كوستى.
لكن مستوى الهلال وإمكانيات لاعبيه ..تجعلنا نقول بثقة تامة إن الهلال قادر على أن يحسم المباراة إن شاء اللـه.
هلال الأبيض مالو الحاصل عليه شنو؟.
بعد الخسارة أمام النسور في الأبيض ..جاء هلال الأبيض وخسر في عطبرة أمام الأهلي عطبرة.
لعنة الهلال أصابت هلال الأبيض بعد تعادله مع الهلال.
الحقوا نفسكم يا ناس هلال الأبيض.
للأسف الشديد النيل شندي خسر أمام هلال الجبال.
الفريق الذي يفقد مبارياته داخل أرضه ..سوف يكون مهدداً دائماً بالهبوط.
شرف أحمد موسى يقود هلال كادوقلي بإمكانيات ضعيفة في الناحية المادية وفي ناحية قدرات اللاعبين.
مع ذلك فإن هلال كادوقلي ما شاء اللـه عليه ..ينطلق من انتصار إلى انتصار.
هلال كادوقلي تجاوز الكثير من الأندية الأقوى منه إمكانيات والمدعومة فنياً ومادياً وسياسياً.
هلال الجبال في المركز الرابع الآن.
هلال الجبال يستحق هذه المكانة.
لا أدرى لماذا روَّج إعلام المريخ لعدم نقل مباراة المريخ أمام الأمل عبر فضائية النيلين.
كمان حصلت ..استجداء الجمهور يبقى بهذه الصورة.
على العموم الشاف ضربة الجزاء أمس من المريخاب كلو قال يا ريت لو ما نقلوها.
زي ضربة الجزاء دي استروها.
دسوها.
………
عاجل : تراوري بقى بيعطي علي جعفر (محاضرة) أثناء المباراة.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *