سعد الدين ابراهيم : سهرة (الخميس)

سعد الدين ابراهيم : سهرة (الخميس)

أغنيات قصيرة
قَسَم
علي بالطلاق
أخون الشقاق
وأنادي بحرارة إلى الاتفاق
لأنو الوفاق
يبدي الأماني اللذيذة المذاق
ويفوز التصافي بكاس السباق
ويغور التعصب يجورو الغُراق
يشيلوا التوالف ويجيبوا الفراق
علي بالطلاق
أغني لعيونا وكلاما الدقاق
سيرك
هرجٌ مرجٌ.. سيرك لافي
ضيقٌ فرجٌ.. فرجٌ مافي
زوجة خالي
أذكر حيث كنا في البيت الكبير
وأنتي كما الفراشة كالنخلة بتدور
من شهد المحبة تدي الناس كتير
وجدي في عنقريبو كالأسد المصور
حبوبة بتصلي باقي وجيها نور
ممراحة وحنينة ضحاكة ثغور
والشِعبة بتتاوق للونسة البراح
بدوية بتساسق من ما جا الصباح
رحلت يا حليلة للحور المِلاح
قسمة

عندك جمال وأنا عندي فني
مين غيري لي حسنك يغني
معادلة
ألقاكا عاقد حاجبيك
أعمل تقيل ما حاسي بيك
امكن غرورك زاد عليك
أنا فيني شلال كبرياء
لو أنت نهر الحسن فيك
احتماء
يا شعبي يا أستاذي
يالفيك حماي وملاذي
يا البيكا بقوى الساعد
وبيك القلب فولاذي
إيه العمل
لو بقينا زهور حديقة
أو بقينا طيور طليقة
ألف ايد تمتد صوبنا.. في دقيقة
الزهور تفقد بريقا
والطيور ح يصادروا صوتا..
تاني ما تعمل موسيقى
إعلان
يا سلام على حبنا
حب جديد وكأننا
نبدو بنحب بعضنا
التقول مليون سنة
فنانة
صوتك طرب..أدى الندوات للحروف
صورتك عجب.. صورة ملاك في زول ولوف
حبك صعب.. من وين أجيب قدرك ظروف
حسنك غلب.. يا نور وضل.. يا سمع وشوف
إدمان
وحيد أنا إلا من أحزاني ماشات في ازدياد
براي أنا ياما في أحضاني والحزن اعتياد
تقرير
ياتو فينا القاسي أكتر
أنت يا سارق قمرنا
فجأة من نصة سمرنا
ولا خناك
واحنا شفناك
غير أماني بسيطة
يبست ياعذابنا قبل تخدر
نشيد
يا حمايم للسليم طيري
يا طلايع للمجد سيري
بكرة تفرح أحلام صغيري
أسرار
لو بتعرف سر غلاوة البذرة ما بترميها في الأرض البوار
لو بتعرف سر غلاوة الشمعة ما بتقيدا في نصة نهار
وسر غلاوة الغيمة أنها ما بتقيف فوق كل دار.

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *