بابكر سلك : بي إيدينا نبنيك يا بلدنا

> وللأوطان في دم كل حر يد سلفت ودين مستحق
> وتغنى الناس لأوطانهم كثيراً
> ومن أجل أوطانهم قدموا جهداً كبيراً ومقدساً
> فازدهرت أوطانهم ونمت
> وبينهم كان المتخاذلون
> والطابور الخامس
> والمتخابرون مع جهات أجنبيه لمصالحهم الخاصة
> وكان التمن خيانة وطن
> ما أحلى الانتماء
> وما أعظمه حينما يكون للوطن
> عندما تكون التضحيات لأجل وطن قدم له السلف دون منٍ ولا أذى
> البيت وطن
> الحله وطن
> المدينة وطن
> المحافظة وطن
> الولاية وطن
> والوطن وطن
> أيها الناس
> المريخ وطن
> وطنا الباسمك كتبنا ورطنا
> أحبك
> أحبك حقيقه وأحبك مجاز
> أحبك وأحييك
> أيها الناس
> تنتظم وطني المريخ نفرة إعادة تأهيل النادي
> نادينا ينادينا
> لأنه أصبح خرابة
> إهمال لسنين عددا
> قضى على الأحمر والأصفر فأصبح يابساً
> أثاث فخم أصبح خردة
> مكيفات غير موجودة في أماكنها
> ومراوح مخلوعة من أماكنها ولمبات بي مكناتها غير موجودة في مكاناتها
> ومراوح أخرى مخلوعة من الحصل للمراوح المنزوعة
> ولمبات منزوعة الدسم
> بورد سااااكت
> لامكنة ولا إستارتر
> كشافات تكشف عن إهمال مقصود وضعف إداري كبير
> ومستنقع مياه غرب مبنى النادي في الاستوائية زيو مافي
> أجزم بوجود التسي تسي فيه
> وخردة وكرور بالهبل في كل الطوابق
> سراميك قايم وسراميك نايم
> وحمامات أظن أن مجرد ذكرها قد أزكم أنوفكم
> حمام مبيض وحمام مفقع
> وحمام ود قلبا مولود داخل السقف المستعار لهول النادي
> أسي هو ذاتو والد
> ده غير الجندب والفار والعنكبوت
> منظر لم يعجب الشفوت الجد جد.. فانتظمت حملة إعادة تأهيل دار النادي
> إنهم الشفوت الذين تقاطروا من كل حدب وصوب
> دعموا مادياً وعينياً وبالجهد البدني
> فبدأ الأمر ظاهراً للعيان
> الشعار كان
> بي إيدينا نبنيك يا بلدنا صممنا لازم نبنيك
> تدافع الشفوت من أجل إعادة البريق لدار النادي
> أي زول التزم بشيء جابو
> زي شوبش الحنة
> مافي زول قال حاجة ما عملها
> النادي خلية نحل
> عمل وعسل
> ومازالت الوفود تتقاطر
> على سبيل المثال أمس التقيت بالشفوت
> مريخاب للأبد
> مريخاب أسياد بلد
> قروبات شبكة الزعيم
> أما الباشمهندس مبارك محمد علي، والاشمهندس نفيسه هاشم
> كانت مساهمتهما عدد200 شتلة زهور تطرح زهوراً بألوان الشعار أحمر وأصفر
> الوجيه حامد بدوي ومجموعته مصممون على تغيير جميع أبواب النادي الى أبواب صينية موديل حديث
> وتستمر الشفتنة
> دكتور مدثر خيري ومنتدى المحبين التزموا بجميع أعمال الكهرباء المتبقية بعد المساهمة
> لأن كهرباء النادي تحتاج لتغيير شامل كامل لا الى إعادة تأهيل وتلتيق
> ولكن
> أيها الناس
> يسأل الناس عن سبب الموقف السالب لإعلام المريخ تجاه هذه التظاهرة
> نمتلك تلاتة صحف حمراء جميعها يشكل غياباً عن الساحة
> إهمال أم سلبيه أم إستراتيجية؟
> أسئلة تطرح نفسها وتنتظر الإجابة من الإعلام الأحمر
> أيها الناس
> تداعت كثير من القروبات للترويج لمقاطعة الصحف المريخية جراء سلبيتها المحيرة في موضوع إعادة تأهيل النادي
> شخصياً أخجل وأتوراى خجلاً خلف هذا الموقف السالب
> فهل يعترف الإعلام الأحمر بقصوره ويعكس ما يدور بالكيان بكل شفافية؟
> المهم
> من فاته قطار المشاركة الفرصة موجودة
> ومن فوت قطار المشاركة عمداً عليه مراجعة مريخيته
> من ساهم بقرش ببقى مساهمة
> ومن شارك بمليار ببقى مساهمة
> ومن سدد جنيه وهو لا يملك غيره يكون أعظم زول فينا لأنو بكون ساهم بكل ما يملك
> أيها الناس
> في القروبات في كلام حايم مفاده مقاطعة مشروع2870
> بل وكمان مرسلين للناس طريقة الخروج
> وقالوا لأنو الشركات بتشيل القروش وما بتدي المريخ
> ده كلام فارغ
> أي قرش بتحول المريخ بشيل نصيبو فيهو
> لكن على لجنة التسيير ضغط الشركات لتحسين خدماتها
> لأنو في شفوت كتاااار بشاركوا والشركات ما قاعدة تخصم منهم
> عليه لا داعي لمغادرة الاشتراك في الخدمة
> أيها الناس
> سنعود عودة تفصيلية لموضوع إعادة تأهيل النادي
> أدبياً أي زول مفروض ياخد حقو
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> الطماطم بي هنا رخصت لينا
> الدكوة بي هنا غلت علينا
> نحنط الطماطم ونصبرها يا والينا
> لمن الدكوة ترخص لينا؟!
> قول الطماطم حنطناها واتصبرت نحنا البصبرنا شنو يا والينا؟
سلك كهربا
ننساك كيف والكلب لما يسمع الصبر بنقلب ويواصل نومو
والي لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *