بابكر سلك : يلا نقولا

> ونحن في نادي المريخ نتابع الانجاز الشبابي
> النجار يطقطق في الخشب
> والمريخ يطقطق في الكورة
> الشباب يطلي الحوائط بأجمل الألوان وأزهاها
> والمريخ يطلي الوجدان بلون النصر
> البصري على الخط يراقب ويوجه
> وألوك على الخط يخطط لنصر جديد لمريخ شديد
> ناس ساس يزينون في الواجهة
> والمريخ يزين طلتنا بنيجيريا.. شباب القروبات خلية نحل في العمل
> والمريخ ينقط عسل
> وحينما اعلن الرائع ناصر بابكر نهاية المباراة بفوز المريخ
> رقص الجميع
> توتا والتومات
> سعدية وايناس وست الشاي جات بي جاي
> كل الشباب على السقالة وعلى النجيلة
> رقصنا على انغام
> يلا نقولا يلا نقولا المريخ ده فن وكورة
> شخصياً حتيتو حت حلال
> رقص مباح
> والغريبة لما دراج شغل لينا اغنية الرائعة حرم النور
> داير اقولا ياناس انا… انا بعشق النجمة أنا بشجع المريخ
> فرحة وسط مجهودات أولاد القروبات خلقت في القلعة الحمراء جواً استثنائياً
> قلت ليكم الحقوا القطر واركبوا معانا
> التحية لاولادنا الاشاوس الذين قدموا للجنة التسيير اكبر هدية
> هدية نيجيرية
> التحية لاولاد القروبات الذين ادخلوا في قلوبنا فرحة وانشراح
> الذين اثبتوا ان العشق المقدس يدفع العاشق ليقدم ما يعتبر من المستحيلات
> اثبتوا لنا ان مع عشق المريخ لا مستحيل
> المهم
> الحكم امس اظنوا كان مسخن
> قاموا النيجيريين لبسوهوا كسكتة من السخانة
> والغريبة اي حكم بلبس الكسكتة بنقض هدف وبفوت ضربتي جزاء
> شيء غريب فعلاً
> ايها الناس
> اخص بالتحية علي جعفر
> واخص اكتر
> بخيت خميس
> قروشي داك تاني الا يشوف ليهو ركشة يسترزق منها
> واخص بالتحية عبدو جابر
> ولن ننسى الحسن
> ولكن تبقى التحية لكل المجموعة
> مبروك لونسي ورفاقه
> ايها الناس
> تمضي مسيرة المريخ ظافرة
> ومن بين براثن الظروف هاهي صحيفة المريخ تخرج للناس
> لاظرف قدر يوقفها للابد
> ولا شماعة الامكانيات كانت سبباً كافياً لتواصل اقامتها بالعناية المكثفة
> عادت لتعود ايراداتها داعماً للكيان
> نقاطة بي جاي ونقاطة بي جاي بتبقى مطرة دعم وسيول خير وبركة
> ونحن في انتظار الاستثمار يا لجنة التسيير
> سريع العائد وطويل المدى
> قدامنا مشوار افريقي طويل إن شاء الله
> ايها الناس
> بخيت خميس ما كان بخيت خميس
> كان بخيت الاسبوع كلو
> ولعله الحل الامثل لمشكلة الطرف الشمال التي اخرجتنا كثير من البطولات المضمونة
> ولن يتطور بخيت الا باستمرار المشاركة
> والمجرب لا يجرب
> وللشفوت رأي واضح في حتة الطرف الشمال دي
> وبركة الجات منك ياجامع
> ايها الناس
> مبروك للبلد
> مبروك للبنت والولد
> مبروك لماضي المريخ وحاضره الذي يبشر بمستقبل عريض
> مبروك لكل الشفوت
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> امس المريخ جاب الفرحة لينا
> ومن غير المريخ في البلد دي سبب الفرحة الفينا
> بارك لينا يا والينا
> ولو المريخ واماتنا بغتربوا معانا يا والينا
> حرم تصبحوا ما تلموا في زولاً فينا
سلك كهربا
ننساك كيف وقلنا نهاجر الكلب قال ماتنسوا كلبكم يا اخينا
والي لقاء
سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *