داليا الياس : منو القال إنت سافرت

منو القال إنت مني بعيد؟!
بحسك نبضي في الشريان..
وأحسك في قليبي وريد
بتدخل روحي زي كل يوم..
وتطلع مني بوح وقصيد
وأشيلك في العيون إنسان..
وأشوفك فرحة زي العيد
وسافر شيل معاك الشوق..
وخلي عيوني للتسهيد
وعااارف إني بيك ولهان..
وإني معاكا هاني سعيد
زماني العشتو من دونك..
وحاتك ما بعدو أكيد
وليلي المرّ دون عينيك..
بمر في الحسرة والتنكيد
عبيرك عبّا كل الكون..
وصوتك ردد أحلى نشيد
ملاذك مأوى من الخوف..
ومن الحيرة والتشريد
لقيتك وفيك حنان منساب..
يذوب فيني أي جليد
تعال نفتح مجال للغد..
ونمشي طريقنا إيد في إيد
معاك اتبددت أحزان..
كبر.. جوانا أحلى وليد
وفاض نيل الأماني تساب
ولبست روحي حلم جديد
بحبك.. وما في أبداً زول..
بحبك زيي بالتحديد
وأريدك ريدة ما كانت..
ومين الزيي تاني بريد؟؟!!
* تلويح:
غيب وتعال.. تلقانا نحنا يانا نحنا

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *