بابكر سلك : اجري.. يا عشري 2

بابكر سلك : اجري.. يا عشري 2

> الزعيم الآن في العلمة
> الرجال غابوا وجابوا
> يفكر الزعيم في طريق الدخول للمجموعات
> وغيرنا يفكر في الدكاكين والسكاكين والكساتي
> نحمد الله
> لوك يستجدي جمهور المريخ ليبقى
> والعشري يجري يجري يجري
> المريخ عالم جميل
> حتى في الفلس يتمسك به الاجانب
> والهلال في اوقات ثرواته يهرب منه الاجانب
> بفسخ العقد
> بالهروب كما فعل الكوكي والعشري
> بأي طريقة يغادر الناس الهلال
> الجميع داير يتفكفك
> كردنة ده مولع بخور شطة ولا شنو يا روشا!!
> ما حدث بين فئتين من جماهير الهلال لم نقبله والله
> الفئة الاولانيه راحت للفئة التانيه في مطرحها
> وضربتها وحرقت ليها حاجاتها
> ولما سألنا الفئة الاولانيه ليه عملتي كده
> قالت الفئة التانيه غلطانة وطايحه في الناس
> وما عندها صليح
> مقاتلة الجميع
> قدر ما نصحناها رفضت تفيء الى امر الله
> فقاتلناها حتى تعود لرشدها
> فإن فاءت فمرحب بالصلح والسلام
> لكن بيني وبينكم
> مهما كانت المبررات الحصل ما بشبه الهلال ولا بشبه مجتمع الرياضة عندنا
> وحقو الناس تبطل مكابرة وتعود لرشدها
> فميادين الرياضة ليست ساحات حرب
> ولكنها مساحات للتنافس الشريف في ظل روح رياضية تعترف بالهزيمة قبل النصر وتؤمن بالتعادل وتحترم الآخر
> ما حدث بمدرجات الهلال يوم نيالا وصمة في جبيننا جميعاً
> لا نكايد بها الإخوة الاهلة
> لأن الأمر يمس المجتمع الرياضي كله
> اللهم انصف اهل الدكاكين وشتت شمل السكاكين واجعلنا في الوسط الرياضي كما كنا متحابين يا رب العالمين
> المهم
> روشا وفطومة أختي
> أيام رئاسة جمال الوالي
> كانوا بعيرونا بانو المريخ في تلاته سنين جاب اربعة مدربين
> الآن
> وحكومة روشا وفطومة تدير شأن الدولة الهلالية
> وفي خلال اربعة اشهر
> تناوب على تدريب الهلال ستة مدربين
> منهم الشاردين والفاسخين والهاربين
> ويفتخر روشا في اصدارته بذلك
> معللاً بانو الهلال عندو قروش يغير زي ما داير
> طيب جمال الوكت داك عندو نبق؟
> العشري شرد اول امس الضهر
> امس الصباح جريدة روشا جايبه صورة المدرب الروماني الجديد وسيرته الذاتية
> وكمان جا امس يوقع العقد وماشي عطبره طوالي
> العقد ده اخروهو شويه يا روشا
> اعتبروهو خطوبة
> تعارف
> قولوا عندنا شوره
> طوااالي مع المدربين ديل تعقدوا والشغل يقوم قبل العرس
> بعدين اسي الزول الروماني العقدتو ليهو ده
> عارفين انو دفعة نيكولاي شاوسيسكو في اساسية بخارست؟
> الزول ده شدة ما عجوز
> بقول للكورة تيوة
> وبقول ديب سنتر فرويد
> اسي كان قال للشغيل انت ديب سنتر فرويد
> الشغيل يمشي وين عاد!!
> ياخ ده بقول للحارس قواني
> والمساك هاف باك
> اسي الدمازين ده لو قال ليهو انت هاف باك
> الدمازين ما بقبلها منو
> ياخ ده شدة ما عجوز
> بقول لصانع اللعب هاف ماش
> اسي دي ابو عاقلة بفهمها ليكم
> والغريبة لما يقول الوناقي
> دي غايتو بفهموها ليهو الطواقي
> لأن وجود الكسكته بجعل المعنى ده هو الاقرب والانسب
> ياخ ده شدة ما عجوز
> بقول لرجل الراية اللايظ مان
> لايظ مان مع كشافاتكم دي بتبقوا كشري يا فطومة
> لكن المحيرني
> من هروب العشري لحدي جية الزول ده الوكت ما بكفي
> طيارات رومانيا مرقن قبل هروب العشري
> الزول ده كان قريب خلي بالك
> كان وين يا فطومة؟!
> فلاي دبي دي الله يختها
> شغاله زي الهايس
> تنقل اليوم كلو
> صاحبكم ده ما يكون نسي وجا بالعقال
> غايتو اسكراب الشارقة ده يا هو زاتو اللامي لينا الجقور في العرضة
> ايها الناس
> استغرب من الذين ينتظرون عودة الوالي عشان تاني يشيل الشيلة براهو
> كنت أتمنى أن نتمنى عودة الوالي بعد ان نقسم على معاونته على الشيله
> استغلاليتكم دي هي سبب تنحي الوالي مرات عديدة
> ايها الناس
> اكتب قبل لقاء ابو زرد المدربو شرد بأمل عطبرة
> واتوقع مانشيت روشا كالآتي
> هلالنا فقري بدون العشري
> حاتوحشنا يا كردنة
> اقسم بالله بنحبك لوجه الله
> سردب يا جنا واقعد
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> النتيجة طلعت جد لينا
> الشفع كلهم نجحوا لينا
> كلو شيء زاد يا والينا
> المتوقعنو يجيب ميه يا والينا
> ميتين جاب لينا
> والمتوقعنو يجيب ميتين قفلها لينا
> زمان لما كنا قدرهم مية واربعين كانت في حدودها ولينا
> لكن كنا بنعرف القرفصاء وبنكتب يشرئب يا والينا
> اسي ديل ميتين وستين وام قللو يقولوا ليك استهجاها لينا
سلك كهربا
ننساك كيف والكلب قال ميتين تمنيه وسبعين شنو؟ تعالى وبص… اربعطاشر ونص
والى لقاء.
سلك

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *