زاهر بخيت الفكي : حشاش بي دقنو..!!

شوف غيرنا قوليهوا النضِم..
ما بنتلدغ..
من جُحرِ واحد مرتين..
ما بسرى في أجسادنا سِم..
شعباً مدرّع بالقيم..
رافع شعار الله أكبر مُلتزم..
ماسك صلاتو على نبيك..
صادق مُحصن بالعلِم..
خائف كتير من الله..
قُبال الممات..
من قبلِ ما يبلى الجسِم..
خليهوا نضمك ما بفيد..
يكفينا كُل القلتوا من زمناً بعيد..
في رُبع قرنٍ أو يزيد..
نحنا خاشين الفيلِم..
حافظين تفاصيل الفيلم..
حتي البطل عارفنوا عارفين الإسم..
كان الصبُر ترياقنا ليك..
من يوم مجيك..
رابط قِناعك في وشيك..
خايف تجيك..
الطامة قُبال تستجِم..
أهلك قبيل قالوها ليك..
ما ترجى زول ..
قاعد يحش بي دقنوا في الزرع الوهم..
لابد حصادوا يكون سراب..
راقدة الأرض أضحت يباب..
تدخل صراع تمرق نزاع..
والخاتمة كانت هي الخراب..
والشر بِعِم..
مُبهم كلامك يا أخي..
لي غيرنا ما عاد بِنفهِم..
كل الصلات البينا كانت ..
والرباط الكان وثيق..
أصبح ضعيف زي خيط رقيق..
ناسجاهوا كانت عنكبوت..
بيهوا تَعمِر في البُيوت..
الواهنة قال رب العباد..
خليهوا يا سيدي النضِم..

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *