بابكر سلك : سودان المريخ يا فطومة

بابكر سلك : سودان المريخ يا فطومة

> كتبت فطومة اختي > انه سودان الجميع وليس سودان المريخ يا عالم > ونحن نقول انه سودان المريخ يا فاطنة > ولما تم اطلاق عبارة سودان المريخ الوكت داك الاحزاب في البلد دي تلاته > ورابعهم واهمهم كان ولسه هو المريخ > ولما نتكلم عن الرياضة لا مجال غير قول الحق > سودان المريخ > ده قول الحق > فمن رياضياً قدم للسودان انجازا غير المريخ؟ > سؤالي هذا يشمل الانديه والاحزاب بما فيها اي حزب > ويشمل الحكومات والمنظمات والهيئات وحتى الجمعيات الخيرية > من قدم لهذا البلد تتويجاً قارياً غير المريخ؟ > وتقول فطومة > كلنا يعلم ان الدولة لا تهتم بالرياضة ولم تلتفت لها اطلاقاً، وتلك سياسة احترمناها تقديراً لتفاصيل كتيرة > عبارة الدولة الواردة في كلام فطومة الفوق ده ما عرفنا مقصود بها الدولة ولا مقصود بها الحكومة ولا مقصود بها الحزب الحاكم يا فطومة؟ > قلتي لي سودان الجميع ولا شنو!!! > لكن اياً كان المقصود بها الامر واحد > طالما فطومة تحترم للدولة او قل للحكومة او قل لحزبها الحاكم عدم اهتمامها بالرياضة وعدم اعارتها مجرد التفاتة تقديراً لتفاصيل كتيرة > نحنا زاتنا يا فطومة نحترم ذلك القصور للدولة او قولي للحكومة او قولي لحزبك الحاكم > وعاد هو جنس احترام > نحترم للدولة او للحكومهة او للحزب الحاكم عدم اهتمامه يا فطومة بالرياضة > لأننا مقتنعون بأن الدولة او الحكومة او حزب فطومة تهتم بأمور كثيرة > اهتمت بالماء وجابت المويه للعطشان حتى خرجت كلمة ظمأ من معجم اللغة السودانية > قال ليك يا فطومة واحد سأل عمك قوقل السوداني > كتب ليهو ظمأ > عمك قوقل قال ليهو ماذا تريد؟! > ما فهمها قوقل > كلمة زي دي في معجم اللغهة السودانية خلاص ببح > بقت زي كلمة «القحطلين» في العربي > نحن يا فطومة نحترم للدولة او للحزب الحاكم او للحكومة > ايهم مقدم على غيره. > نحترم لهم عدم الاهتمام بالرياضة والثقافة كمان > لان الدولة او الحكومة او الحزب الحاكم > ايهم مقدم على الآخرين > مشغول بتوفير اللقمة للجعان > مما نتج عن ذلك الاهتمام ان طمحت بطون الشعب السوداني واقعاً لا وعداً وتمني > اتملت البطون لدرجة ان الاطباء في السودان يجرون البحوث لتوسيع حجم معدة المواطن عشان تشيل الخير الكتير الناتج عن اهتمام الدولة او الحكومة او الحزب الحاكم بشبع المواطن > طفحت البطون > طفحت البطون بيتزا ومارتديلا واسكلوب باني وهوت دوق وشيش بشقيه طاووق وكباب وشيبس كمان > تغيرت «تريعة» المواطن > من باااااااااع > لي كاااااااااك > وكل ذلك بفضل عدم اهتمام الدولة او الحكومة او الحزب الحاكم «حسب الترتيب عند فطومة» بالرياضة > وتقديراً نحترم للدولة او الحكومة او الحزب الحاكم عدم الالتفات للرياضة لاعتبارات منها > التفات الدولة او الحكومة او الحزب الحاكم للتعليم ومجانيته والزاميته > فكانت المناهج التي جعلت من اطفالنا علماء > واندثرت الامية بفضل مجانية التعليم > مجتمعنا مشتهي طالب ظروفو تمرقو من المدرسة ويشتغل ورنيش > مجتمعنا ما فيهو طالبة قصدت العلم والعفة > فعملت جرسون في محل شية عشان تصرف على دراستها وتخدم في مرتادي تلك الشوايات > تسعين في المائة منهم ينفقون على الشواء ما حصلوا عليه سرقة وظلماً وتجنياً > لذا نقدر للدولة او الحكومة او الحزب الحاكم عدم اهتمامه بالرياضة يا فطومة لتلك الاعتبارات > ونقدر للدولة او الحكومة او الحزب الحاكم عدم الالتفات للرياضة لأنه ملتفت شديد على الدولار > تلك الالتفاتة التي جرت انف الدولار بالارض ومزقته امام الجنيه تمزيقاً قطعه حتت > فكيف بالله كان يكون الحال يا فطومة لو اهتمت الدولة بالرياضة ولم تهتم بالاعتبارات الاخرى المتعلقة بالموية والاكل والكهرباء والتعليم والدولار > بركة الما اهتمت الدولة او الحكومة او الحزب الحاكم بالرياضة يا فطومه يا اختي > ايها الناس > قولوا لي فطومة اختي انه سودان المريخ يا بت > فطومة > قلتي لي سودان الجميع؟ > استنفار سودان الجميع > استثمار سودان شنو!!! > ايها الناس > بمناسبة استثمار > عشان الشبكنا يخلصنا لازم نستثمر > على الأقل نقفل باب التدخل في سودان المريخ > واذا كانت الدولة لا تهتم بالرياضة ولا تدعمها زي ما قالت فطومة > حقو الدولة تخلي للرياضة مكتسباتها > عشان الرياضة تشيل نفسها > يجب على الدولة او الحكومة او الحزب الحاكم > ان يترك للرياضة دخلها بدون ضرائب واتاوات > اذا النسور لاعب ضد نيل شندي في الخرطوم > الدخل قول مليون بالقديم > طلع حق الاستاد والاتحاد والضرائب على التذاكر والحاجات التانية الحامياني > بفضل زي خمسمية وعشرة > النسور ده يمشي شندي بي شنو عشان يلعب هناك ضد نيل شندي؟ > الخمسمية دي بالواتساب ما بتوصلو شندي > حقو الدولة او الحكومة او الحزب الحاكم طالما ما بهتموا بالرياضة يا فطومة > يقدموا اعفاءات للاندية دي عشان تشيل روحها وتعمل بنياتها التحتيه والاساسية > فاذكر ان جمال الوالي تعب جمركياً تعب شديد ايام الطابق التاني > لكن ما قلتي لينا يا فطومة > شغل الجوهرة الحالي ده معفي ولا ما معفي؟ > لو بقي معفي ووووب > تبقي الدولة او الحكومة او الحزب الحاكم بكيل بمكيالين > ولو بقي ما معفي وووبين > لان تدخل الدولة في شيء ما بتدعمو ولو باعفاء ببقى عدم خجلة سااااي > عدم خجله من الدولة او من الحكومة او من الحزب الحاكم > فطومة كلمينا > معفي ولا ما معفي؟ > «اورري يا بت» > مية في المية ولا ما مية في المية؟ > ايها الناس > قوة الرأس تأتي بنتائج يصعب تداركها > وعندها يتمنى الناس لو يعود الزمن ليلينوا رؤوسهم > ولما تحصل الحلاقة > وتشوف اخوك حلقوا ليهو > بل رأسك وكلم البعدك يتبلبل > ايها الناس > ان تنصروا الله ينصركم > اها > نجي لي شمارات والي الخرتوم > كان شفت يا والينا > اتلخبطت الأمور علينا > فهماً وورينا > شنو الفرق بين الدولة والحكومة والحزب الحاكم يا والينا؟ سلك كهربا ننساك كيف والكلب قال اهمال الرياضة اثمر اهتمام بيطري بينا وإلى لقاء. سلك

تعليقات الفيسبوك

تعليقات

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *