بابكر سلك : ولكن المريخ أكبر

> المريخ ينقاد للتعادل في كادوقلي > هكذا ترد إلينا العبارة من المريخ موبايل > طولنا منقادين > خسرنا خمس نقاط من تسع وعلى التوالي > في آخر تلاته مباريات المريخ طوالي ينقاد > حتى أصبحنا مثل سيارة تعليم القيادة > حقو في فنايلنا بي ورا نكتب سواق تحت التمرين > عشان ما كلو يوم يدقشونا > ولكن العزاء اننا بنبني في فريق > بنا صبري دبايب > كلو يوم نبني ونكسر ونعدل برانا > واذا وجدنا العذر لاي شيء > لانجد العذر لمظهر البعثة القبيح > كلو زول لابس بي طريقتو > ومحسن بنفس الفنيلة > فهل يتناسب مظهر بعثتنا أمس مع سياسات الانضباط التي تملأ أفق المريخ هذه الأيام؟ > أيها الناس > قوة العزيمة هي أساس النجاح > فإذا كان الكيان المريخي كله قد فقد الأمل في الدوري بعد الخسارة من الهلال > لا لشيء سوى ان فارق النقاط كبير > تتذكروا لما كنا فايتين الهلال بسبع نقاط؟؟ > هل استسلم كيان الهلال وقتها وخنع لخسارة الدوري؟؟ > التاريخ يحفظ للأهلة ادارة ولاعبين وجماهير وكيان > انهم لم يفقدوا الأمل > بل تمسكوا بالفوز بالدوري > وعملوا لذلك الهدف > وكان لهم ما أرادوا > فازوا ببطولة الدوري بفارق سبع نقاط > عوضوا السبع الفرق وزادوها مربوطة تاني > فلماذا الخنوع ورمي الراية وضعف العزيمة عند الكيان المريخي؟ > المهم > البقت بقت واقع > واذا دايرين نغير الواقع > حقو نتعامل معاهو باستراتيجية انو واقع نريد فراقه والفكاك منه > عشان نطلع من العبارة المنكسرة دوماً التي تقول > بنبني في الفريق > فريق ود البنا ده البنا فيهو بنتهي متين؟ > أيها الناس > لم يرحب مجتمع المريخ بالتسيير تو عشان بتديهو حقنة تفتيح البشرة > غشه تجعل من الأخضر أصفر براقاً > والجينات ياها الجينات > وفيها كمان احتمال سرطانات > فهناك أهداف محددة اعتقد ان التسيير تو جاءت لأجلها > اذا نجحت فيها تنجح في إدارة الكفة بحرفية > واذا فشلت نلخ الطين ونرجع لي قصة بنبني في فريق > هناك ملفات يجب فتحها منذ الآن > ملف مدرب بقامة الكيان > معلم يجيد البناء والتعمير > احترم محسن وبرهان > ولكن المريخ أكبر > كبير الله > وملف اللاعب جابسون > هل وجد عرضا خليجيا فعلا وبقى داير الطلاق > ام طالب بمستحقاته في نيجيريا ولم تصله > ام القصة هي عدم احترام من اللاعب للكيان وماهاميهو الحاصل يحصل > وملف الشركة الصينية والاستثمار > هذا من اهم ملفات التسيير تو > اذا نجحت فيه قطعت مشوارا طويلا في سكة النجاح > واذا فشلت تدينا حقنة تفتيح بشرة نعيش بيها كذباً بين الناس > نكون من برة نراري > وجيناتنا تحمل في طياتها ابنوسية لا ارى سببا لإبادتها بالكريمات > تلك هي اهم أهداف التسيير تو > فهل نأمل منها ان تدير تلك الملفات بوعي وحكمة!!! > أيها الناس > ان تنصروا الله ينصركم > أها > نجي لي شمارات والي الخرتوم > كان شفت يا والينا > أمس قرينا وقالوا لينا > عن قصة الزول الامتلك ساحات جاكسون الموقف والمينا > شايل باسمو ألف من طباليها ودكاكينا > ومن سياسات الإصلاح يا والينا > نزع المنح وإلغاء الطبالي وجميع دكاكينا > فهل هذا هو الإصلاح يا والينا > أم الإصلاح إحضار الناس الجهجهوا الامة وأدوا الزول كل دكاكينه؟ > ام نزع الدكاكين يحلل الذين صدقوا الدكاكين للزول من حق الامة الحزينة > ماقادر أصدق القريتو يا والينا سلك كهربا ننساك كيف والكلب قال تتعدد الدكاكين والزول واااااااحد والى لقاء سلك

تعليقات الفيسبوك

تعليقات

الرد

لن يتم نشر عنوان بريدك الإلكتروني. الحقول الإلزامية مشار إليها بـ *